Iniciativa pol Asturianu organiza la presentación n’Asturies col poeta Juan Carlos García Hoyuelos. L’autor castellanu trai’l proyectu poético-musical “Aire, fuego y deseo” (n’asturianu “Aire, fueu y deséu”), tornáu a toles llingües ibériques y al ladinu (sefardí).
La entidá tien a bien sofitar un proyectu qu’entiende como un acercamientu ente toles llingües ibériques y que, sobremanera, ye una bona noticia pa la fastera de fala asturllionesa, territoriu que necesita de axuntar fuercies y texer llazos p’algamar una presencia del idioma muncho meyor fuera d’Asturies.
El llibru cunta con bon númberu d’autores asturianos, lleoneses y mirandeses como Berta Piñán, Pablo Texón, Inaciu Galán, José Alfredo Hernández Rodríguez, Roberto González-Quevedo o Amadeu Ferreira. Esta obra lliteraria vien acompañada d’un discu con cantares de músicos de la talla de Tarna, Toli Morilla o Manuela Elena. Amás de la nuesa collaboren con esta obra instituciones como l’Academia de la Llingua Asturiana, y les asociaciones llioneses y zamoranes Faceira y Furmientu.
La “Presentación-Recital” va ser el vienres 31 a les 21 hores nel espaciu de La Caja de Músicos (Cai Buen Sucesu) en Xixón y va cuntar cola presencia y llectura de tolos autores y collaboradores del llibru na fastera asturiana ente los que s’alcuentren grandes nomes de la nuesa lliteratura. Al términu del actu, va facese una folixa abierta pa tol que-y pueda interesar.
Toli Morilla estenó coincidiendo con esta fecha un videu con unu de los cantares del proyectu.
This work is licensed under a Creative Commons Attribution 4.0 International License.
