El discutiniu ta pente la prevalencia de la normativa española, que desixe la votación direuta por parte de los militantes, o la específica asturiana, que contempla nos sos estatutos la escoyeta de direición por asamblea
Na XII Asamblea d’IU, cellebrada en Xixón, foi escoyía l’actual direición de la coalición, col votu de 183 de los 192 delegaos que participaron na mesma. Nel intre de la votación nun taben presentes na asamblea -por voluntá propia- los representantes del seutor críticu, partidariu d’un mayor siguimientu de les polítiques centraliegues, asumiendo los estatutos estatales perriba los asturianos, asina comu de facer a IU Asturies partícipe de la confluencia con Podemos llevada a cabo a nivel estatal.
De magar la impugnación de l’asamblea por parte d’esti seutor críticu, la presidencia estatal d’IU alcordó nun reconocer la nuea direición de la coalición n’Asturies, ya que dende Xunu del 2018 “toles federaciones tan obligaes a aplicar esti criteriu”, considerando que la norma xeneral ye superior a la específica de la federación asturiana.
En contra d’esta visión tan los documentos aprebaos pola asamblea, que definen a IU Asturies comu una organización “política y xurídicamente soberana, dotada de personalidá y capacidá xurídica propia.”
La decisión final nun ta en manes de los dellegaos nin de los militantes asturianos: sedrá ratificada en conceyu de l’asamblea política y social d’IU, másimu organu de direición de la coallición a nivel español, el 22 de Febreru, plazu nel que los seutores en discordia podrán dir a la gueta un alcuerdu que satisfaga a la direición xeneral.
Redaición InfoAsturies
This work is licensed under a Creative Commons Attribution 4.0 International License.
