Ven un posible delitu continuáu de malversación nos gobiernos d’Areces, Fernández y Barbón

Definen la non tramitación llegal y correcha fiscalización de contratos y sovenciones comu’l “casu ERE” del PSOE n’Asturies  y en consecuencia, Andecha Astur desixe la dimisión d’Adrián Barbón, comu cabezaleru del últimu gobiernu responsable d’estos fechos, el cese de tol responsables políticos implicaos nesta trama y la torna darréu de los millones d’euros gastaos en contratos y sovenciones en condiciones de malversación. “Sólo asina Asturies podrá entamar a aspirar a tener un réxime de gobiernu dignu y democráticu”

Hai pocu más d’un mes la Sindicatura de Cuentes d’Asturies presentó un informe definitivu de fiscalizacación sol estáu de la Cuenta Xeneral d’Asturies de 2018. Nel informe apondérase más la cantidá de custiones cuntables xestionaes con xeitu que la gravedá (y tampocu nun son poques) de los fechos cuntables, alministrativos o políticos que la Sindicatura califica dolcemente comu incorreiciones, irregularidaes o incumplimientos, cuandu tratándose de custiones d’obligáu cumplimientu regulaes poles lleis, debería calificar los fechos de posibles delitos.

Toos esos posibles delitos acaba presentalos Andecha Astur ente la Fiscalía Xeneral pa que proceda a investigar la calificación penal que proceda.

Na denuncia, Andecha fae un ampliu llistáu de fechos recoyios pola Sindicatura que son costituyentes de delitu y ocurrios demientres el gobiernu d’Adrián Barbón. Estos incluin la torga al acesu informáticu en tiempu rial al exerciciu fiscalizáu, asina comu la cuantificación de la totalidá de desviaciones de financiación (positives y negatives). Falta una contabilidá afayaíza de los gastos con financiación afeutao y la memoria de l’Alministración d’Asturies nun s’afaya a lo desixío pola normativa de contabilidá público.
Amás, los ingresos cuntables d’esti exerciciu inclúin 166 millones € pendientes de cobru de fondos mineros, yá contabilizaos n’años anteriores.
Nun foi posible verificar el valir llegal de dos espedientes de modificaciones de créitu, por valor de 30’6 millones €, nin la esistencia d’un alcuerdu llegal ente’l Comité d’empresa y el sirviciu d’Esplotación y Caltenimientu Carreteres pol sistema rotatoriu na
fechura d’hores estraordinaries.
Cogersa, incumpliendo la llei, nun facilitó a tiempu la información dexisío a los entes consorciaos, pero nun foi la única entidá dependiente del “Principado” n’incumlir la llei: un terciu de les entidaes obligaes nun informaron sobro los contratos fechos nel exerciciu.

La Conseyería de Desenrollu Rural y Recursos Ñaturales, CADASA, COGERSA SAU, IAPRL, SEPEPE y SESPA, amás, nun facilitaron la rellación de contratos menores (lo que nel casu del SESPA representa una cantidá descomaná), incumpliendo la Lley de Contratos del Seutor Públicu.

Na cuasi totalidá de los contratos analizaos l’Alministración nun fai un seguimientu de la execución del contratu, renunciando a controlar la calidá del sirviciu o materiales contrataos, asina comu’l cumplimientu de les obligaciones del contratista y les posibles responsabilidaes penales derivaes.
Los planes estratéxicos de sovenciones de tres conseyeríes (Facienda y Seutor Públicu; Desenrollu Rural y Recursos Ñaturales; Infracadarmes, Ordenación del Territoriu y Mediu Ambiente) nun inclúin les sovenciones nominatives
concedíes en 2018, lo cualo pue dar por nules eses sovenciones y obligar a los beneficiarios a tornar les cantidaes recibíes, según sentencies del Tribunal Supremu.
Les sovenciones nominatives incluyíes nos presupuestos de 2017 tornaron a dase nel añu 2018, de mou irregular, pol solu fechu de prorrogase los presupuestos.
L’inventariu de l’Alministración inclúi oxetos por más de 800 millones € que nun correspuenden con nenguna tipificación de la Llei de Padremuñu, polo que deberíen escluyise o clasificalos de mou llegal.
Los consorcios ascritos a l’Alministración asturiana nun s’inclúin nos presupestos prorrogaos nin na Cuenta Xeneral de 2018, inclumpliendo la Llei de Réxime Xurídicu del Seutor Públicu.
Incumplióse la llexisllación del Réxime Económicu y Presupuestariu, al nun aperiar una nuea llei en 2018 que determinare’l destín y carauterístiques del endeudamientu posible, por valor de 550 millones €.
El 50% les Conseyeríes del Gobiernu nun fai informes de cumplimientu de les sovenciones nominatives dende l’añu 2016. Nun sólo incumple asina la llei, sinón qu’amuesa un descontrol internu total.
La Conseyería de Sanidá otorga nominativamente’l 69’94% de les sovenciones, cuandu la concesión direuta tien de ser llegalmente una esceición y lo normal debiere ser la concurrencia competitiva a les sovenciones.
Pa finar, l’informe de la Sindicatura Cuentes perafita que, nesta situación, nun-y resultó posible facer una fiscalización operativa de la situación cuntable correspondiente al exerciciu 2018.
Poro, Andecha Astur acaba presentar esti informe a la Fiscalía Superior d’Asturies, pidiendo qu’abra dilixencies pa esclariar les posibles responsabilidaes civiles y penales que se puean derivar de los fechos denunciaos.
Andecha Astur denuncia tamién que ve un posible delitu continuáu de malversación na xestión económico que ficieron los sucesivos gobiernos del PSOE, presidíos sucesivamente por Areces, Fernández y Barbón.

Remembren tamién qu’ ún de los pincipales oxetivos políticos d’esti tiempu ye algamar una alministración pública asturiana democrática y exemplar, comu quieren los trabayaores de la mesma. “Un oxetivu que siempres vieno viciando’l comportamientu mafiosu que nel poder caltuvieron los estremaos gobiernos del PSOE -sofitaos por otros partíos españoles-” comu evidencia la sentencia del Tribunal Supremu, de Setiembre de 2019, sol casu Riopedre-PSOE, onde se señala la esistencia de corrución de la
oxetividá y la imparcialidá na axudicación de los contratos de suministros y obra de l’Alministración Pública (delitos de cohechu, falsedá y prevaricación), sentencia que “Permite valorar el grave déficit democráticu de l’Alministración asturiana”.
Pa Andecha Astur, la non tramitación llegal y correcha fiscalización de contratos y sovenciones ye’l “casu ERE” del PSOE n’Asturies. Y la sentencia del casu Riopedre señala sólo la picalina l’iceberg. En consecuencia, Andecha Astur desixe la dimisión d’Adrián Barbón,
comu cabezaleru del últimu gobiernu responsable d’estos fechos, el cese de tol responsables políticos implicaos nesta trama y la torna inmediata de los millones d’euros gastaos en contratos y sovenciones en condiciones de malversación. “Sólo asina Asturies podrá entamar a aspirar a tener un réxime de gobiernu dignu y democráticu”.

Redaición InfoAsturies