Agora ye Tinéu, pero por esta situación pasaren los conceyos de Cabrales, Peñamellera Baxa, Peñamellera Alta, Teverga, Gozón y Ribadeva, pente otros. Eliminar los servicios de pediatría de los conceyos menos cientrales ye un métodu efeutivu p’afalar a les families con reciella a abandonalos
El serviciu de pediatría de Tinéu ya se viere amenorgáu los caberos años pola redución de dos a un pediatra, pero el treslladu del anterior pediatra, va una selmana, dexó a los más de 800 rapacinos del conceyu ensin serviciu de pediatría. De magar entós ya ensin previsión de reposición del serviciu, los menores son atendios por mélicos de familia, que se reconocen ensin la formación específica que requier la salú de la reciella, ya en casu de vacunes, urxencia o enfermedá grave tienen de desplazase -n’abondos casos a una hora o más de trayeutu- a Cangas pa ser atendios pol servicu de pediatría del hospital Carmen y Severo Ochoa, cola consiguiente saturación del mesmu.
El coleutivu “Cumbre Tinéu” convocó ayeri una manifestación polos drechos de los rapacinos, qu’aconceyó a cientos de persones esmolecies pola salú de los sos fios y poles consecuencies que la perda d’esti drechu sanitaru pue tener nel conceyu, ya que la mengua de servicios afala a les families moces a abandonar el conceyu a la gueta de meyores condiciones. Cumbre Tinéu tamién anició una recoyida de robles que ya suma más de 2.000 sofitos, sumando los recoyios personalmente y la campaña en Change.org.
Tinéu nun ye l’únicu conceyu asturianu nesta situación, que s’ensierta na política de dir desaniciando los servicios nes famoses “esnales” esteriores al “Ária Metropolitana” y dir finando cola Asturies rural, al tiempu que se desdexa la sanidá pública en beneficiu de la privada. Teverga, el mes pasáu, y Raices, en Payares, son otros dos ambulatorios que quedaron ensin serviciu de pediatría nos caberos meses.
Llucía F. Marqués
https://www.facebook.com/yo.y.mas.yo/videos/10221048599234923/
This work is licensed under a Creative Commons Attribution 4.0 International License.
