El de llimpiadora ye de por si un trabayu precariu, con sueldos perbaxo los 400 euros por xornaes a tiempu parcial que, davezu, impliquen desplazamientos que superen el tiempu trabayáu. Nel casu de les llimpiadores del Liberbank, esta situación empeoró desaxeradamente dende que camudó la empresa que presta’l serviciu, pasando de tar a cargu d’Acciona a depender del Grupo Net.

Les desavenencies entamaron cola suspensión del abonu de kilometraxe, cuestión d’especial importancia pa les trabayaores del Ocidente, que tienen que facer desplazamientos más llargos. Cuasi al tiempu foron informaes del tisoriazu que quieren da-y a los sos horarios de trabayu, imponiendo xornaes de fasta 20 menutos; sicasí, les emplegaes siguen cumpliendo los anteriores horarios, más llargos, daqué de lo que nun queda costancia, porque nun fichen. El material de trabayu nun ye abondu y los uniformes nun aporten, dificultando’l desendolcu del so llabor. El toque final a esti panorama ye l’impagu del salariu del mes trabayáu, cuestión que pa les emplegaes ta direutamente venceyada a la so negativa a aceutar la perda de drechos llaborales: nun roblaron los contratos que la nuea empresa mandó por wassap coles nueves y abusives condiciones y una encuesta de riesgos llaborales, ya cubierta.

Sicasí, nun piensen dexase avasallar, saben que les subrogaciones de personal tienen de facese calteniéndose nes mesmes condiciones y tan organizándose pa facer fuercia. Son delles les que tan dimpuestes a perder el trabayu anantes que los drechos.

Nuria Prendes

This work is licensed under a Creative Commons Attribution 4.0 International License.