Concepción Saavedra, direutora xerente del Serviciu de Salú del “Principado” d’Asturies (Sespa), nun convenció a los miembros de la Plataforma pa la defensa, caltenimientu y meyora de la Sanidá del Surocidente Asturianu, que nun descarten movilizaciones si nun ven que los sos requirimientos son teníos en cuenta.

La UVI móvil -col so correspondiente personal d’emerxencies- foi un de los principales temes a tratar, esquivando Saavedra una rempuesta concreta y señalando namás que “la decisión tomaríase a finales d’añu”, ello ye, que ye difícil que nel 2020 Cangas cuente con esti serviciu, pal que se recoyeren más de 5.000 sofitos va un mes. A cambiu, plantega reforciar el serviciu d’urxencies, daqué que non solo nun convence a la plataforma, sinón que lleva prometiéndose dende anantes de les caberes elleiciones, ensin cumplise.

La obra pendiente d’ampliación del consultoriu de Tebongo, la dotación con xeneradores de lletricidá a los centros de salú d’Ibias ya’l reallugamientu o reforma del Cientru de Salú Mental pa que cuente con acesu a persones de movilidá amenorgada foron otros de los temes que salieron nel conceyu, ensin que s’algamare dalu compromisu concretu.

La direutora xerente argumentó “escasez de profesionales” pa xustificar la falta de pediatras en Tineu, daqué difícil de compaxinar cola cantidá de titulaos asturianos forciaos a trabayar fuera’l país por falta trabayu, colos númberos clausus pa estudiar Melecina n’Uviéu y coles escases places ufiertaes pol MIR n’Asturies pa conseguir estes titulaciones. Sicasí, aseguró qu’esa yera “la so prioridá”.

Llucía F. Marqués