Depués de l’avería reconocía por Arcelor nes sos recién iguaes bateries de cok, les emisiones y les ñubes de contaminación continuaron anubriendo Xixón díe y nueche

“En casa abrimos la ventana dos minutos y tuvimos de poner inciensu en tolos cuartos pa soportar los fedores” declaraba PGE, vecín de La Calzada. Una situación que se repite de continuo pero qu’ayeri algamó niveles desaxeraos. Les toses mañaniegues de tola familia, la ropa que destiendes más puerca de lo que se tendió, los coches cubiertos de povisa, neto que les plantes de la ventana… Los vecinos de Xixón nun precisen de consultar na páxina web los mididores -que sigún denuncien los ecoloxistes tan estratéxicamente colocaos pa nun  deteutar la contaminación- pa saber del nivel de contaminación que carecen.

Los avezaos fedores, que medren col atapecer y que faen de determinaos barrios xixoneses un llugar nel que ye difícil andar pela cai, completábense tol díi d’ayeri coles imáxenes de les abondes nubes prietes, que podien acolumbrase a simple vista, provenientes tantu de les mesmes bateries comu del sínter, del que se sabe que ta siendo utilizáu ensin el prescriptivu filtru, que torgaría’l 75% d’esa polución.

La esposición continua a estos contaminantes ta multiplicando los casos d’asma infantil, rinitis, farinxitis, dolores de tiesta, dermatitis y anemies pente la población, convirtiéndola tamién nun puntu encarnáu no que cinca a enfermedaes graves del sistema respiratoriu, cáncanos y enfermedaes cardiaques.

Entantu, alministraciones y empresa faen por tranquilizar a la población con bones pallabres ya ensin tomar les necesaries midies, priorizando’l porgüeyu empresarial perriba’l bientar y la vida mesma de los moraores del conceyu.

Nuria Prendes

This work is licensed under a Creative Commons Attribution 4.0 International License.