Confirmá la presencia d’altos niveles de bencenu en Xixón tres de les emisiones d’Arcelor, el gobiernu municipal non solo nun toma midíes contra la empresa sinón que quita fierro al asuntu

“Dende Andecha Astur consideramos que les graves declaraciones d’Aurelio Martín, conceyal de Mediu Ambiente de Xixón, tres el grave episodiu d’emisiones contaminantes d’Arcelor el pasáu llunes supón un reblagu na política de tolerancia pa con Arcelor p’asitiase direutamente nel tarrén de la conivencia”

Xixón en xeneral y más en concreto los barrios de la fastera oeste carez de continuo d’un severu problema de contaminación ambiente, sigún datos apurrios polos mididores de polución de tola ciudá, -pesi a que, sigún los ecoloxistes, estos controlaores tan estratéxicamente colocaos pa ufrir los resultaos más baxos posibles-. Esta situación, que lleva años siendo denunciada polos vecinos, agravóse abondo na selmana pasá, cuando una nueva avería nes recién reparaes bateries de cok d’Arcelor sumaba les sos emisiones al les producies pol Sínter, furrulando anguañu de manera illegal, ya que’l so filtro nun tará en condiciones de trabayar polo menos dica’l mes de Marzu.

P’Andecha Astur, la pasividá del gobiernu municipal ante estos fechos y les recientes declaraciones del Conceyal de Mediu Ambiente y Movilidá, Aurelio Martín “suponen pasar direutamente d’una inxustificable tolerancia a la complicidá dafechu”. En pallabres de Martín, el fuerte escape que se caltuvo demientres díes “nun foi un problema real de contaminación pa la población cercana”, declaraciones que xeneraron la indinación de la población que vive en primer persona les consecuencies d’estes emisiones.

Andecha Astur ve nesto una nidia falta de sensibilidá del Ayuntamientu Xixón, y una amuesa “del desdexamientu que fai de les sos responsabilidaes nel control medioambiental y defensa de la salú pública de los vecinos”, ya insisten en que  “les declaraciones del Conceyal de Mediu Ambiente y Movilidá de Xixón, restando importancia a les emisiones contaminantes d’Arcelor que demientres tres díis vienen anubriendo’l cielu xixonés, suponen una inxustificable conivencia con dicha empresa en detrimentu del drechu a la salú de los vecinos”.

La organización nacionaliega ya diere parte na Xunión Europea del continúu problema de polución que se carez nel conceyu, polo que ya se recibieron delles sanciones y que ta perxudicando de manera significatible la salú de la población, como espeyen los estudios mélicos.

Redaición InfoAsturies

This work is licensed under a Creative Commons Attribution 4.0 International License.