Tres les derrotes electorales del 2015 l’hestóricu partíu entró en quiebra económica
En septiembre de 2016, el Xulgáu Mercantil númberu 4 de Barcelona decretó que UDC tenía una delda de 22,5 millones d’euros, mientres que los sos activos taben amenorgaos a namás 5,8 millones d’euros. Foi dictáu entós un procesu consursal. Nesti contestu, el Comité de Gobiernu de UDC anunció esti 24 de marzu’l cese de la so actividá como órganu asina como la disolución formal de la organización.
Desaparez asina un protagonista de la vida política catalana del sieglu XX. Unió Democràtica de Catalunya, d’ideoloxía demócrata-cristiana, foi creada’l 7 de payares de 1931, tres la publicación d’una manifiestu robláu por exmilitantes de Acció Catalana y del Partíu Carlista
Na dómina de la II República UDC adoptó una llínea d’actuación abondu centrista, sofitando en 1934 la Llei de Contratos de Cultivu qu’impulsaben les esquierdes, cola oposición tanto de la Lliga de Catalunya como de la CEDA. Cuando tamién en 1934 la Generalitat de Lluís Companys, mui enfrentada al Gobiernu central, proclamó l’Estáu catalán, UDC refugaría participar nesta iniciativa. Tres el fracasu del golpe d’estáu del 18 de xunetu de 1936, los militantes de UDC atoparíanse nuna situación especialmente complicada, siendo escorríos y represaliaos por dambos bandos. Pola derecha española, por republicanos, y pola esquierda española, por católicos.
Mientres el franquismu, UDC fortalecería los sos venceyos col PNV, col cual compartía una mesma ideoloxía nacionalista y demócrata-cristiana. Nes elecciones a Cortes Constituyentes de 1977, participó na plataforma d’ámbitu estatal Federación de la Democracia Cristiana, que namás llogró dos diputaos per Barcelona.
En 1978 llegó a un alcuerdu con Convergència Democràtica de Catalunya (CDC), el partíu de Jordi Puyol, conformándose la coalición Convergència i Uunió (CiU), que gobernó l’autonomía catalana a lo llargo d’un ampliu períodu de tiempu (1980-2003 y 2010-2015)
En 2015 les discrepancies ente Artur Mas (CDC) y Duran i Lleida (UDC) sobre’l procesu independentista catalán provocaríen la desintegración de la coalición.
This work is licensed under a Creative Commons Attribution 4.0 International License.
