Na multitudinaria cacerolada, que tuvo llugar demientres Felipe VI daba’l so discursu, sintiéronse voces comu “Fartones”, “Asturies nun tien rei”, “República Asturiana” o’l ya míticu “Los Borbones, a los tiburones”

Ayeri sintiéronse per toa Asturies los  guelpes de protesta colos que miles d’asturianos desixíen el fin de la sumisión de los asturianos a la monarquía española, l’abdicación del actual rei y la devolución a la ciudadanía de los millones d’euros robaos por esta istitución corruta.

La convocatoría tardía, con menos de 24 hores pa espardela, y la duplicidá de la mesma -que fizo que’n munchos llugares se repitiere la protesta a les doce del mediu díe y a les nueve la nueche- nun torgó que fore un ésitu, tanto de participación comu d’enfotu puestu. En dellos llugares la cacerolada, que duró alrodiu d’un cuartu d’hora, foi acompangada por gaites ya otros istrumentos tocando l’himnu d’Asturies ya’l himnu de Riego, asina comu por glayios contra la monarquía y a favor de la República.

Anque tamién foi xeneralizada la pidición de la utilización pa fines sanitarios de los cien millones d’euros que, presuntamente recibió d’Arabia Saudí, el principal envís d’esti actu de protesta yera desixir el fin de la monarquía española en si mesma. Sicasí, nes noticies espublizaes  nos medios de comunicación oficiales recuéyese únicamente la vindicación venceyada a la donación de les perres, tratando de minimizar l’impautu de la protesta contra la monarquía y convertila nun fechu puntual y cuasi aneudóticu, dando la falsa impresión de que la protesta taba más relacioná cola “cris del coronavirus” y la falta de fondos pa enfrentala que cola cris de la corona.

Nuria Prendes

This work is licensed under a Creative Commons Attribution 4.0 International License.