Pa munchos esta cuarentena ta siendo un ñeru d’esperiencies nuees ya inesperaes. Por exemplu, había xente qu’entá nun topare cara a cara col abusu d’autoridá y pa ellos carecer en propies carnes el míticu acosu del uniformáu veníu a más ye toa una novedá. D’ente les hestories d’estáu policial que m’aportaron escueyo esta, de R.P., pola claridá de la so esposición, pero casos comu esti hai un cientu y ye preciso que se faigan saber. Comu dixere en Hestories del Coronavirus I, el tema ta dando de si y la so intrahestoria da pa un retratu social ensin desperdiciu

“Nun soi dau a compartir esperiencies personales per esti mediu, pero cuento que ye un deber comentar lo que m’asocedió esta tardi. Tampocu fasta la fecha sintiere l’abusu d’autoridá en mios carnes, yera afortunáu, supongo, por supuestu yera cosciente de qu’esistía. Nun hai comu un estáu d’alerta pa que les cais se pueblen d’illetraos uniformaos tocaos cola varina de l’autoridá y qu’entamen a florecer casos d’abusu ya impunidá.

A mi tocóme güei, como ca díe voi aidar a la mio ma a la so casa, llévoy comida, faigo la compra y bonu polo xeneral echo un gabitu coles xeres de casa; la mio ma ta encuadrá dientro los grupos de riesgu y daes les condiciones del confinamientu yo o permisu pa visitala. Tien 87 años
Güei, de la que tornaba de la so casa paróme una patrulla de militares, que ya de por sí impón, entrugáronme a ónde diba y díxi-yos que de regresu a ca mio; de siguío pidiéronme la mio identificación, amosé-yos el mio carné de conducir, a estes altures yo yá taba nerviosu, nun toi acostumáu a tar arrodiáu por cinco tipos armaos, pidióme que-y apurriera’l documentu a lo que me negué, nun llevaba guantes nin mázcara y asina lo indiqué.

“Nun llevo cuasi trés selmanes en casa pa esto”, atención a la ofiensa del comentariu, el so corazonín d’abusón de patiu de colexu enchóse de sangre y la so respuesta foi qu’él yera l’autoridá, que sabía perfechamente cuales yeren les sos atribuciones y que me quedara ellí, darréu emitió dalgún tipu de códigu pola so emisora y en curtios minutos llantáronse dos coches de los nacionales y unu de los municipales, tou bien pensé, esta xente ye muncho más educada, sabe más como fala-y a la xente, en definitiva tienen muncha más sensibilidá. Ja.

La situación foi comu sigue, de sópitu veome arrodiáu de 11 persones armaes, y non, nun tienen muncha sensibilidá, teo d’apurrir el DNI a un municipal, pásame los tos virus porfa, y desplica-yos que vengo d’atender a la mio ma, doi-yos datos, semeya del so DNI y el so teléfonu al que llamar p’acotar la mio versión. Mientres los municipales faen la llamada, avérense los nacionales, non pa manifestame sofitu o comprensión, non non, sinón p’amedraname, y tratame de males maneres, ensin guantes nin mázcara, nun caltienen les distancies de seguridá, indícoyoslo, otra vegada’l mesmu argumentu, ellos son l’autoridá y conocen el protocolu. Faláronme de vusté eso sí, reñéronme por tutealos y espresar qu’a la mio manera de ver aquello yera una perda de recursos .

En definitiva yo yera un delincuente y güeyu, que podíen deteneme, yo nun daba creitu, pensaba qu’esta xente solo vivíen en pelis chusques.
Torna’l municipal, la mio ma acota la mio versión, que vengo de la so casa, pensé bono, foi un momentu desagradable pero yá pasó. A indicaciones del militar, curiau con esto, diz-y que falé-y en males maneres (esto por cierto ye mentira, anque como manifesté anantes daqué nerviosu si taba) y allóñense.Paso otros diez minutos esperando al cabu los cualos el municipal torna col documentu qu’axunto, una multa de 300 eurazos.

Da mieu pensar a quien-y apurrimos poderes cuasi plenos, xente que va saber muncho de vida militar pero que nun tien la más mínima empatía, da miéu qu’un municipal de la mio ciudá siga les ordes d’un militar y me calque 300 pavos cuando vengo de aidar a la mio ma, nun teo drechu a oxetar los modales desproporcionaos, ¿nun tengo dengún drechu? Que coste que taba llevando bien el confinamientu pero agora tengo miéu de salir a la cai y nun ye pol virus.
Espero que nun vos pase daqué asemeyao y si pasa, escaeceivos de los vuesos drechos fundamentales, de la distancia de seguridá que repiten fasta l’enfastiu, de que vos vaigan a falar con respetu, en definitiva ye bonu cerrar los güeyos, alendar, amosar sumisión, ehí fuera hai un montón de xente armada deseyando demostrar la so autoridá, ¡Curiáu!”.

Nun vos perdais Hestories del Coronavirus I, II, III, IV, V, VI, VII y VIII

This work is licensed under a Creative Commons Attribution 4.0 International License.