Piarinos de Xixón ábrese dende facebook a tola reciella d’Asturies, creando un espaciu onde deprender y compartir esperiencies y conocimientos ornitolóxicos, cola reciella comu protagonistes

La estaya de reciella de l’Agrupación de Montaña Torrecerredo, con Marino Muñiz al frente, lleva tiempu trabayando con un bon garrapiellu rapacinos a los que van averando a la natura asturiana. Nes sos escursiones y campamentos non solo deprenden a andar pel monte, sinón botánica, zooloxía, antropoloxía, hestoria y por supuestu, ornitoloxía, tou ello al traviés d’un programa de percorrios encadarmaos en dos grandes bloques, “Conoz Xixón” y “Conoz Asturies”.

Sicasí, l’andanciu vieno a interrumpir estos programes y sabeores de la importancia que tien que los neños y neñes caltengan el so venceyu colo ñatural, ñació la propuesta de deprender sobro la fauna qu’estos dies tenemos más a man: los páxaros. El silenciu de les cais ufre una oportunidá única pa sentir los sos cancios ya’l tiempu llibre permite estudialos con más calma, investigar los sos piares, seguilos colos prismáticos, sacar semeyes… La idega prendió rápido y vióse bien ceo que col grupu de wasap anicial nun daba pa tou, polo que se creó un grupu de facebook col mesmu envís.

Con namás 6 díes en furrulamientu, Piarinos de Xixón cuenta ya con cerca de cien miembros y sigue medrando. Nel grupu puen alcontrase descripciones y debuxos feches polos repacinos, videos y audios pa deprender a reconocelos y deprender el so canciu -nun recomienden utilizar los reclamos, pueden “despistar” a los páxaros-, refranes, cancios y cuentos con páxaros, idegues pa facer comederos y trucos p’averalos a la ventana.

This work is licensed under a Creative Commons Attribution 4.0 International License.