La dellegación asturiana de l’Asociación pa la Prevención, detección ya Intervención del Abusu Sesual infantil pidi la collaboración ciudadano pa protexer a la reciella
Envalórase qu’una de ca 4 neñes y un de ca 7 neños carez, anantes de cumplir los 17 años d’edá, abusos sesuales. Esto asocede en tolos niveles sociales y na mayoría los casos -más d’un 80%- cométenlu los familiares y allegaos, de forma repitida. L’actual situación de confinamientu agrava seriamente les condiciones d’estos menores, que s’atopen aisllaos col so agresor, indefensos ante’l maltratu sicolóxicu, físicu y sesual.
Per un llau, ellos son los primeros en pagar la frustración y l’ansiedá de los sos abusaores, colos que tienen de convivir les 24 hores, lo que de xuro aumenta la frecuencia del abusu. Per otru, el preslle de colexos y de contautos con otres persones ayenes al ámbetu familiar esborrió les llendes que los agresores pudieren tener por miéu a que les remortines sicolóxiques o les señales físiques fueren deteutaes, lo qu’agrava la intensidá del maltratu.
Nes actuales circunstancies los menores tienen bien dificil pidir ayuda o buscar abellugu, polo que ye imprescindible que los vecinos tean sollertes a posibles berros o lloros que puedan faer abarruntar un casu de malos tratos y en casu de dulda, llamar al teléfonu del menor (900 20 20 10 si llama un menor y 91 726 01 01 pa los adultos) o ponese en contautu coles autoridaes al traviés del 112. Aspasi Asturies tamién ufierta asesoramientu sobro como actuar nestos casos, al traviés del so email (aspasiasturiasgmail.com) o de la so páxina facebook.
Llucía F. Marqués
This work is licensed under a Creative Commons Attribution 4.0 International License.
