Tal comu reconoció’l presidente’l “Principado” al entamu l’andanciu, presllar la entrada a Asturies sedría una midía emportante pa torgar l’espardimientu del coronavirus; sicasí, nun tien competencies pa ello. Poro, dende Andecha Astur pidin la intervención de los conceyos y que nun se cargue a la población cola responsabilidá de denunciar a los turistes

La primer foleada de visitantes a les zones más turístiques y a los pueblos d’Asturies, ocupando les sos segundes viviendes y aloxamientos rurales, multiplicó nunos díes l’espardimientu del coronavirus, llevándolu a fasteres nes que, pol so aisllamientu ñatural, taben fasta entós protexies y colapsando los servicios mélicos, ya escasos pa la población autóctono.

El mesmu Barbón reconocía entos los sos míseros poderes al afitar esplicitamente qu’él pesllaría Asturies pa torgar los contaxos, pero qu’España nun lu dexaba.

Na Selmana Santa, cuando les cifres asturianes ya entamaben a remontar lo pior del andanciu, una nueva marea de turistes anubre Asturies, ensin que l’Estáu Español paeza ser quien a controlalo. Dende’l “Principado” tornen a reconocese incompetentes y Barbón dexa en manes de los ciudadanos la responsabilidá del control del movimientu de mases, pidiendo a la población que denuncien la ocupación de les viviendes de segunda residencia que tan acoyendo otra vuelta a los sos dueños foriatos. 

Ante esta situación, Andecha Astur pidi que seyan los Conceyos, precisamente  “l’alministración más averá al ciudadanu, los qu’amuesen coherencia y compromisu  cola so vecindá, asumiendo con enfotu la misión de controlar la ocupación de viviendes de segunda residencia y desixendo al Estáu la intervención, control y sanción de ca casu concretu” y acusen a Barbón de querer tapecer la so falta de poder rial llamando a la ciudadanía a exercer de lo que nesta cris se noma “policía de balcón”,afalando a los vecinos a convertise en chivatos, daqué que señalen “nun ye dalgo que vaiga fortalecer la calidá democrático de la nuesa convivencia”.

Custiones sanitaries al marxe, esta situación espeya tantu l’incumplimientu de les sos fonciones por parte l’Estáu español comu les deficiencies de la política territorial, cultural y turístico del “Principado”, que col so apueste pol turismu ta tornando dellos conceyos d’Asturies en parques temáticos del paradisu estraos de xalés braniegos “xenerando problemes nel caltenimientu la identidá cultural, dependencia económico, especulación urbanístico, encarecimientu la vivienda, empeoramientu de la calidá de vida de los asturianos d’esos conceyos, etc.”.

Ye de destacar que los qu’aporten a Asturies nun son el pueblu llanu español, sinón la xente de la clas más alta, que puen permitise caltener la so casina de vacaciones, y que balten cola so presencia tol esfuerciu fechu polos asturianos pa contener l’andanciu.

Nuria Prendes

This work is licensed under a Creative Commons Attribution 4.0 International License.