SUATEA denuncia que l’alministración nun ta sustituyendo’l profesoráu de baxa por enfermedá o xubilación, dexando ensin cubrir les necesidaes de los escolinos y torgando a los docentes l’acesu al puestu trabayu que-yos correspuende
El desavezáu reaniciu de les clases tres de les “vacaciones” ta estráu de polémiques y falta de claridá nes direutrices que se dan a les families, docentes y escolinos. Nos casos en que falta un profesor/a la cuestión complícase un pasu más, polo que se fae necesario cubrir les baxes con prontitú.
Sicasí, el sindicatu d’ensiñantes asturianos SUATEA denuncia que’l casu ye xustamente’l contrariu, afirmando que-yos costa la esistencia de delles baxes, tantu por xubilación comu por enfermedá, ensin que l’alministración se faiga ecu d’elles. De fechu, dende Conseyería informen de la reincorporación de 100 docentes a la so plaza y d’una única solicitú de sustitución, pero al mesmu tiempo reconocen “problemes téunicos pa retomar les convocatories y alxudicaciones” ya informen de que tan estudiando cubrir les necesidades imprescindibles pa l’atención de los estudiantes.
Amás de les evidentes consecuencies de la falta de mayestros pa los escolinos, esta situación vulnera también los drechos llaborales del profesoráu que tendría de facer les sustituciones y qu’al nun trabayar perderán los drechos correspondientes.
La conseyería aconceyó por vidiuconferencia pa tratar esti problema colos sindicatos d’ambetu estatal ANPE y UGT, dexando al restu de llau, xusto un díi anantes del aconceyamientu de tolos sindicatos na Xunta de Presonal Docentes, lo que pa SUATEA costitúi una illegalidá por acesu a información privilexada y negociación n’esclusiva, polo que nun descarten aniciar actuaciones llegales.
Redaición InfoAsturies
This work is licensed under a Creative Commons Attribution 4.0 International License.
