Téngolo too planeao. Va ser un sábadu de los bonos, como los d’anantes; y eso que nun teo perru
Mañana entamen les midíes de desconfinamientu, y teo de confesavos que me voi ver un pocu apurá, porque nun se que da nun aprofitar cuando te dexen salir y a mi quédame un horariu un pocu apretáu, salme una xornada llaboral cuasi completa.
Vereis, a les 9 en vilu salgo a la cai con leggins y la sudaera’l mio fíu y doi un voltiu, a pasu rápidu y a un metru y mediu distancia, cola mio collacia, que va tiempu que nun mos vemos; a ver quien me diz que nun tamos faciendo esporte.
De 10 a 11 salgo col mio pa y de 11 a 12 cola mio ma, que va sieglos que nun los veo más que pela ventana y ya ye hora de charrar un puquiñín y ponese al díe. A les 12 podría salir ya colos guahes, pero como teo tiempu faigo primero la compra pel barriu y a eso de la una póngome cola xinta. A eso de les 4 saco a pasiar al primer guahe; son tres, asina que me da xusto fasta les siete, fin del horariu infantil. Por poder podría dar otra vueltiquina pela nueche, pero nun cuento que me queden ganes, que ya llevaré siete hores… a nun ser que me llamen pa quedar y entós salgo un ratín, dica les once.
Teo de poner toles alarmes en reló que sinón voi finar por salir a andar en bici pente los vieyos y ármola, que me conozo.
Si trabayare fuera casa, porque entós otru gallu cantaría. Ya anantes del desconfiamientu tengo sentío dicir que ye imposible mercar anantes de les ocho si sales de trabayar a les siete y media y que con un pocu suerte podíen sacar a los guahes media horina anantes de les nueve. Agora pamidea que los sos fios nun van pisar la cai. Pero bono, nun pasa na, siempres podrá salir a correr a les 6 de la mañana o a les 11 la nueche.
Como los que viven solos: look vampiru esportista pa salir al riscar o depués del atapecer. Al final ser familia numberosa va tener ventaxes.
Pa un analís internu del díe ente díe pandémicu, nun vos perdais Hestories del Coronavirus I, II, III, IV, V, VI, VII, VIII, IX, X, XI, XII, XIII, XIV , XV y XVI
This work is licensed under a Creative Commons Attribution 4.0 International License.
