Les lletres asturianes son la materia de la que tan fechos los mios suaños. Los mios camientos nun pescancien otru camín y les mios alcordances más gayasperes tienen les pallabres y l’acentu del Nalón. Nesta llingua deprendí a falar, lleer y escribir, y nella deprendieron tamién los mios fios. Non solo llucho pol asturianu, vivo n’asturianu y la de mio ye una llucha pola mio propia pervivencia, pol drechu mesmu a ser yo, a ser nos
Llucía F. Marqués
Esti añu nun vamos poder dir a la Mani les Lletres de tolos Mayos; con un pocu suerte, diré n’Ochobre. Con un permuncho de suerte (una cantidá estratosférica d’ella) nun diré, porque ya tendré reconocíu llegalmente’l drechu a utilizar la mio llingua (tien bemoles la cosa, pidir “drechu a falar”, na Europa del sieglu XXI).
Va costame, son munchos años, dende los 5, ensin faltar; nun fallé siquier cuando salí del hospital na tardi mesma del vienres, a poques hores de la mani, n’aquellos años nos que les pallabres d’Arias nos facíen tremar d’esperanza. Nun se m’escaez cuando anunció que pal 2.000 tendríemos la Oficialidá… la fecha abultábamos entós endemasiao lloñe, nun podíemos esperar tanto. Quien diba dicinos que los enemigos confesos y los llobos con piel de corderu diben engafar más la llucha, que diba medrar l’ensin xacíu, l’españolismu más xabaz y l’odiu faza tolo qu’Asturies representa. Que dibemos carecer traiciones de la xente que menos esperábemos y qu’otros diben querer remanar al so gustu la llucha nuesa de cerca de mediu sieglu, defendiéndola de boca pa fuera y poniendo-y zancadielles.
Pero tamién, quien diba diciyos a ellos, a los enemigos de tolo asturiano, que dibemos siguir equí, falando, escribiendo, reclamando, desixendo la oficialidá, pesi a les torgues burocrátiques, a la presión mediática ya educativa, a la represión y ridiculización constante, a la manipulación y l’adoctrinamientu. Usaron tolos medios al so algame pa finar con nos y equí siguimos: nun cuntaben con qu’aguantáremos tantu, porque ellos nun saben que nun mos podemos rendir.
Asina qu’esti empreslle nun me va quitar de glayar, un añu más, el mio drechu. Llingua nacional, llingua oficial. Güei, mañana, pasao, dende casa, dende la cai, dende estos medios informáticos escaparate del mundiu y del país. Tolos díis son pa mi de les Lletres Asturianes, porque pa los que de verdá tamos enfotaos nel drechu a ser nos -que nun ye otra cosa lo que se mos ñega- les Lletres nun son namás una fecha en calendariu, la llucha ye diaria y fina namás cola victoria.
This work is licensed under a Creative Commons Attribution 4.0 International License.
