Nesta páxina alcontraremos productos caltenibles, de prosimidá y calidá, dende xata roxa y pitu caleya a l’amplia ufierta de los llagares, les cerveces ya’l vinu de Cangas, pasando pol pexe, miel, fruta, repostería, quesos, llegumes, verdures, pan, güevos o incluso  platos preparaos, tou encadarmao n’ocho families allimentaries pa facilitar que caún alcuentre lo que busca dientro’l país

Entrevistamos a Lluis Nel Estrada, la persona de la que surdió el proyeutu

– Pa entamar, fainos un resumin del proyeutu. D’au surde esta idega?

La idega surde nos primeros díes del confinamientu…Viendo, cola xente de la empresa tenolóxica Gapmedia, la necesidá d`engabitar al pequeñu sector agroallimentariu llocal que se vía tremendamente perxudicáu pola pandemia al pesllase les sos canales cimeres de comercialización… La hostelería, el turísmu, y los mercáos de proxímidá.

 – ¿Plantégueslo comu un proyeutu puntual pola situación o ye a llargu plazu?

Plantegóse como un proyectu puntual pola situación, pero ensiguida vimos que la ferramienta que teniamos nes manes tinía muncha potenciabilidá pa sofitar a un ampliu segmentu de la producción agroallimentaria de prosimidá, que aida a afitar población nel mediu rural, caltenible, de productu de calidá y diferencial. Amás decatamosmos tamién que al tratase de una ferramienta que furrula al travies d`un xeollocalizar del potencial veceru; la ferramienta podía ser util nun solo n`Asturies, sino tamién notros pueblos del estáu español.

– ¿Ya camentares na idega anantes de la cris prevocada pol andanciu?

La verdá ye que non… esta ye una d`eses oportunidaes que surden de un imprevistu… nesti casu un imprevistu de dimensiones descomanaes.

– Dicen qu’un bon negociu ye’l que beneficia a ambes partes. ¿Qué ventaxes tien la plataforma pal productor y pal consumidor?

La plataforma ye una ferramienta de contactu, que tien coste 0 pa consumidor y pa potencial veceru. Permite agrupar d`una manera atractiva a esi segmentu de pequeños productores agroallimentarios asturianos que te comentaba. Con unes característiques determinaes. Amás ye mui versatil porque, d`una parte val pa averar a consumidor y productor, pero tamién val como directoriu de consulta pa potenciales distribuidores o comercializaores de productu. Tamién al agrupar a gran numberu de productores (más de 200 asturianos anguaño y cerca de 300 en total) permitemos guetar soluciones a les sos necesidaes de manera agrupada. Tamién afala la comercialización directa fuera d`Asturies pente potenciales veceros d`otres partes del estáu que gusten d`esta triba de productos diferenciales y de calidá.

– La plataforma entamo a furrular va pocu mas d’un mes, ¿comu ves la evolucion?

Comu te dicía tamos cerca de los 300 productores… d`equi a pocu andaremos polos 500 de los que mas de 300 serán asturianos. Tuviemos perbona aceptación pente el colectivu de productores asturianos y perbona acoyida na prensa nacional y estatal. Institucionalmente van apaeciendo sofitos tantu n`Asturies, al traviés de la marca Alimentos de Paraiso Natural, comu en dalguna otra comunidá autonoma… Too eso anímamos a siguir avanzando y d`equi a poco vamos tener prestoses novedaes.

-Na campaña #Consumiasturiano proponse, pente otres coses, la creación d’una plataforma de contautu direutu productor/consumidor asemeyada a la vuestra pero xestionada pola alministracion, con un alcuerdu de tresporte y qu’incluya más productos que los agroalimentarios. ¿Abúltate una idega positiva o crees que tien de ser xestionao esclusivamente dende la aniciativa privao?

Anguaño les instituciones públiques nun pueden comercializar direutamente nin intermediar na comercialización de ningún tipo de productu… Lo que nosotros tardamos en asoleyar unos dies dende una institución pública puede tardar meses sinon años en vese fecha una rialida… Soi un gran defensor de lo públicu pero los productores necesiten angüañu soluciones rápides que dean cobertura rápida a les sos necesidaes.

– Abulta chocante qu’una web que pretende dar puxu a lo d’equí y dar valir a lo nueso nun tea escrita n’asturianu…

La urxencia agora mesmo ye consolidar el proyeutu y busca l’algame estatal. Tendrá versión n’asturianu y si la consolidamos, tamién n’otres munches llingües

– Prestaríame que llanzares un mensaxe a los consumidores p’afalalos a consumir productos del país

El mensaxe ta llanzáu dende siempres… nun pasa de moda… Pero yo toi comencíu de qu`esta pandemia y la situación d`incertidume a la que mos enfrentamos de magar agora va poner munches coses nel so sitiu.. Nada nun va ser fácil porque hai munchos factores que nun vamos poder controlar como quixeramos los ciudadanos y ciudadanes. Pero d`esta salse xuntos, mirando pa lo que produz el vecín, reactivando el nuestru territoriu y consumiendo na midía de los posible productu llocal. Lo de casa, y cuando nun pueda ser lo de casa, que seya lo de más cerca d`ella… Lo más caltenible, lo más llimpio, lo más xusto… y poro lo más sano.