“El cambiu na contabilidá de los casos reduz el númberu d’hospitalizaos y de fallecios n’Asturies” diz testualmente’l titular d’un periódicu asturianu. Comu si eses foren coses que pudieren “reducise”, comu si pudiéremos esborriar el pasu pel hospital, la congoxa, el dolor de les families con calcar nel ordenaor un númberu más piqueñu

Llucía F. Marqués

El diecisiete de Mayu del 2020 rexistrábense n’Asturies un total de 317 defunciones por covid-19, una cifra qu’escuende 317 nomes, 317 cares, 317 families.

El diecinueve’l mesmu mes, ayeri, a les ocho la tardi, namás yeren 303 los muertos.

¿Conseguimos n’Asturies el milagru la resurreción? ¿hubiere 14 erros mélicos o de contabilización y eses persones enxamás morrieren? ¿Hai 14 zombies pel país, ocultos tres de la mazcarina?. Non. Camudaron el sistema de contabilización y cenciellamente, eses presones ya nun cuenten. Lliteralmente.

A los hospitalizaos tamién los desapaecemos: pasamos a 1.088 dende l’anterior cifra de 2.328.

¿El secretu d’esta sópita “meyoría”? Dende Madrí dicen qu’hai que camudar el sistema de contabilidá. Agora namás cuenten los confirmaos por PCR -preba que nun se fizo a tolos hospitalizaos, nin a tolos fallecios nin muncho menos a los cientos d’enfermos que pasaron el virus en casa ensin dala atención mélica por ser casos “menos graves”-.  Resultau: d’un clic la traxedia ye menos y los sos xestionadores puen ponese más a gusto la medaya.

De tou ello saco tres conclusiones:

Una, que la información que mos dan ye intencionadamente sesgá, incompleta ya erronea, ya que remanen los datos al so gustu acordies yos convenga.

Dos, que con esta xente fasta pente los muertos hai xente de primera y de segunda.

Tres, que si lo manda Madrí, obedezse, puntu reondu.

Resumiendo, méxenmos enriba y dícenmos que llueve.

This work is licensed under a Creative Commons Attribution 4.0 International License.