Presentámosvos un nueu capítulu de la intrahestoria coronavírica con una demostración empírica de qu’entá queden categories y que nun ye cosa d’escaecer qu’un paisano nun ye una berza

El nuesu protagonista de güei sal a la cai depués de cerca dos meses empreslláu, ensin ver más que a la so muyer y a la xenra, que-yos trae la xinta a la puerte casa. Allargó l’empreslle un pocu más de lo que dicíen na tele por un mecigayu d’hipocondria inducía, precaución oxetiva por edá y condiciones de salú y una cierta galvana con querencia al sofá. Amás, el chigre de so nun tien terraza y nun abrió fasta güei y si el so chigre taba preslláu tampocu había muncho pa que salir.

Asina que güei  sal a la cai a la hora’l vermú comu si s’enfrentare a un ataque bacteriolóxicu, escoltau pol so fíu, presente p’asegurar que se cumplan toles prescriptives midies de seguridá. Desinfectante’n na chaqueta, mazcarina en focicu, les manes en bolsu por que los guantes dan-y perceguera, sal del ascensor y llánzase al pelligru col mesmu valor col que va unos años enfrentaba la policía nes manifestaciones de la Naval.

Ya na cai esquiva transeuntes con pericia de pilotu, dos metros son pocu, si hai falta sal a la carretera pa garantizar una distancia más que prudente. Mira desafiante a los vecinos, comu si envede contaxadores potenciales foren criminales dimpuestos a pega-y una puñalada al mínimu despiste. La distancia acurtia si son conocíos, lo xusto pa compartir unes pallabres y siguir el camín.

Menos mal que’l chigre ta na mesma cai. Ya n’antoxana alcuentra a Mino, ex-compañeru de trabayu  col que  -anantes l’andanciu- compartía hores de parque colos respeutivos nietos. Darréu posen les mázcares, saquen les manes del bolsu y abrácense pente esparabanes y palmaes d’espalda “Cuantu tiempu, cabronazu, a que te dediques” “Cuantu tiempu, cuantu tiempu” repiten emocionaos.

El fiu-control de seguridá intervién axorizáu

-¡¡Papa!! ¡la distancia!.

– Calla ho, Nun digas tochaes -espeta’l paisano, ensin soltar el costazu de Mino, que posa la mazcarina pa echar un pitu- ¿Nun ves que Mino ye de confianza?.

Pa un analís internu del díe ente díe pandémicu, nun vos perdais Hestories del Coronavirus I, II, III, IV, V, VI, VII, VIII, IX, X, XI, XII, XIII,  XIV , XV  y  XVI

This work is licensed under a Creative Commons Attribution 4.0 International License.