Una delegación añal parte dende Asturies a Colombia pa verificar el cumplimientu de los Drechos Humanos nesi país

La XVI Delegación Asturiana pa Pescudar l’Estáu de los Drechos Humanos en Colombia fizo esti añu’l so trabayu demientres la primer quincena de marzu de 2020, esquivando por perpocu les restriciones de movimientu prevocaes pol andanciu y dexando cumplía cuasi tola axenda d’actividaes previstes xusto a tiempu pa tornar al llar anantes del preslle de fronteres.

A la so vuelta redautaron un ampliu informe, disponible n’asturiano, inglés y español, nel que resumen el testimoniu de la so esperiencia en tierres colombianes. El documentu, de 52 páxines, inclui cuestiones venceyaes a los DDHH, comu l’estáu de los Alcuerdos de L’Habana y del procesu de paz coles FARC, el furrulamientu de la Unidá de Busca de Persones daes por Desapaecíes, l’aplicación de la Llei d’Amnistía, la situación col ELN  o la implicación de les empreses nel incumplimientu los drechos humanos.

Especial interés reviste’l repasu de los ataques a la dirixencia social, la persistencia del paramilitararismu y les execuciones estraxudiciales y masacres. Tamién dediquen bona parte la so atención a les situaciones personales más difíciles: esllarigamientu, tortura, privación de llibertá, reciella y DDHH, situación de la poblacion LGTBI y de los pueblos indíxenes…

Pal desendolcu d’esti informe, la dellegación asturiana entrevistóse con 80 organizaciones ya istituciones colombianes.

Redaición InfoAsturies