El criaderu de xatos IXP de la cadena de supermercaos nun algama pa cubrir nin el 25% de la carne que venden nes sos carniceries

La polémica decisión del departamentu de Sergio Marqués, responsable de compres na estaya, de francer contratos con dellos productores de la IXP Xata Asturiana y la insuficiente produción del criaderu propiu pa cubrir la demanda fae temer que la empresa vienda engañosamente carne con otres procedencies, ya seya faciéndolo pasar por Xata Asturiana o vendiéndolo ensin especificar el so orixe, pero amparaos na imaxen que yos da la utilización del sellu de la IXP nos sos puntos de venta.

Andecha Astur vien de facer un triple llamáu a les istituciones  pa torgar que se de esti casu y aprofiten pa pidir un sofitu más decidíu a la IXP Xata Asturiana. Per un lláu, pidin al Conseyeru de Desendolcu Rural, Agroganadería y Pesca, Alejandro Calvo, la so intervención nel conflictu pa garantizar el futuru de l’Asturies ganaera, comprometía col  caltenimientu la IXP Xata Asturiana y pa torgar que los abusos nel mercáu condicionen de manera tan inxusta un seutor productivu fundamental pal país asturianu. Per otru, soliciten al Conseyu Regulaor de la IXP Xata Asturiana y al Conseyeru Sanidá, Pablo Ignacio Fernández (al traviés de l’Axencia de Seguranza Allimentario, Sanidá Ambiental y Consumu), que faigan un seguimientu con munchu pricuru de la carne que d’agora n’alantre comercialice Alimerka con esta etiqueta, desixendo que la carne de xata d’otros países apaeza afayaízamente separtao y etiquetao, “pa evitar que se tracamundie a los consumiores con práutiques engañoses o fraudulentes”.La organización nacionaliega nun solo avisa de la posibilidá de fraude, sinon qu’acusa a la empresa de xenerar un importante dañu a Asturies, poles fuertes consecuencies económiques sobre la ganadería asturiana (Alimerka comercializaba’l 50% de la carne d’Indicación Xeográfica Protexío Xata Asturiana) y polo que supón de custionamientu d’un modelu sociocultural y productivu tradicional nel país.  “Dende esi control hexemónicu del mercáu, en plena cris socioeconómica del coronavirus y traicionando la so estratexa publicitaria sofitá nel so amor a Asturies, Alimerka acaba francer los contratos n’esclusividá con 30 cebaeros d’esta IXP, dexando na cuneta a munches más families comprometíes nesta xera”.