La empresa, que nun se presentó a les negociaciones, pon en pelligru la vida de Fernando González, Fer, al nun permitir que cuente con dengún acompangante pa pasar les nueches, depués de 33 díes ensin comer

Tres tener de ser evacuáu el tercer fuelguista de fame, los compañeros de la plantiya d’EBHI organizárense de manera que ca nueche hubiere un compañeru que acompangase a Fernando González Rodríguez, por mor del so deterioráu estáu de salú.
Ante esta aniciativa, la rempuesta d’EBHI foi prohibir l’acesu a cualisquier persona, esponiendo más entá la salú de Fernando González Rodríguez, ya que amás de los riesgos que conlleva el tar 33 díes en fuelga fame, súmase’l pasar la nueche en soledá, colo que queda espuestu a cualisquier eventualidá que puea surdir, ya que al tar la plantiya n’ERTE, esta selmana nun hai naide na terminal durante’l turnu de nueche, salvo’l personal de seguridá privao.
Cabe destacar que’l personal de seguridá privao de la empresa ufriose voluntariamente a controlar periódicamente al compañeru y presta-y l’apoyu necesariu.
N’otru orde de coses, güei domingu 14 de Xunu, tuvo llugar una marcha solidaria en bicicleta, que partió de l’antigua sede de la Autoridá Portuaria de Xixón, na cai Claudio Alvargonzález, percorriendo el centru la ciudá pa terminar na Plaza’l Marqués, onde tuvo llugar la concentración diaria de apoyu a los fuelguistes.

Redaición InfoAsturies

This work is licensed under a Creative Commons Attribution 4.0 International License.