El “Principado” non solo permite les continues matances d’animales asturianos, sinón que la Guardería de Mediu Natural del mesmu Principado vien de matar dos más, en plena época de cría

Llucía Fernández Marqués

Los llobos matáronse dientro la riestra de controles de población que tan desendolcándose na Sierra del Cuera col envís d’amenorgar la población d’esta especie na fastera, que ta catalogada como “d’apaición esporádica del llobu”.

l’actuación enmárcase dientro la llegalidá vixente, ya que se supón que nesta cordelera llitoral “nun tien d’asentase esta especie”. Esta decisión tómase ensin qu’haiga cifres oficiales de los daños nestos montes nos caberos meses, afitándose en que “los ganaeros aseguren que nun aparen de sucedese”.

Seique son abondos los ganaeros que sofiten esta triba d’actuaciones, son munchos tamién los que se decaten de que’l problema nun ye’l llobu, sinon la deficiente xestión de los espacios naturales y prohibiciones, como la de dexar en monte los restos d’animales muertos –tanto los domésticos comu xabaces- que fuercien al llobu a buscar cebera pente’l ganao.

Estes muertes vienen a sumase a les d’osos, tolines, raposos, utres, aigles, frangüesos y un llargu etcétera de seres tan asturianos –o más- que nosotros que tan alcontrando’l so fin pol cenciellu fechu d’esistir nun país que se promociona como’l paradisu natural pero que nun tien sitiu pa la so propia fauna.

This work is licensed under a Creative Commons Attribution 4.0 International License.