El fin del plazu llegal pa reclamar la reposición de trabayaores qu’hubiere salvao los 7 puestos de trabayu y que, por llei, la empresa tendría de solicitar, da por finada la fuelga de fame, pero non la llucha

Adrián Serrano Tomé, Eduardo López, Fernán González y Adrián Rey Menéndez entraron el 13 de Mayu nes dependencies d’EBHI, la empresa d’estiba del Puertu El Musel. Entraron dimpuestos a dalo too, porque lo que taba en xuegu nun yeren perres, yera’l proyeutu de vida de 7 families que confiaron nel cumplimientu la llei y los alcuerdos y que cuntaben colos sos trabayos pa vivir. Asina lo destacó Fernan González, qu’ayer abandonó la fuelga fame, depués de 37 díes y con una perda de masa corporal de más del 20%, una bones presllara’l plazu pa que la empresa reclamare la tasa de reposición que-y correspondía.

Nun consiguieron lo que pretendíen col so empreslle, pero nun se sienten derrotaos, salen cola dinidá del que llucha y cola solidaridá de la clas obrera asturiana qu’ayeri tornó a amosar el so sofitu a les puertes d’El Musel. A la so salida del puertu Fernán Gonzalez, pesi al so precariu estáu de salú, posóse del coche pa, acompangáu de los otros fuelguistes y de los dispidios, ufiertar a los presentes un emotivu discursu nel que se mecíen, a partes iguales, l’arguyu de clas ya’l dispreciu por un gobiernu a los que la so vida nun importó un res y por una empresa qu’algamo cotes de miserabilidá inconcebibles, prohibiendo la entrada de mélicos, l’acompangamientu al caberu fuelguista, les concentraciones de sofitu de los compañeros ya incluso, el caberu díe, llegando a presllar con llave les puertes de los baños.

“Los únicos que salieron derrotaos son la miseria humana que queda ehí dientro” dixo  Fernan, aludiendo non solo a la empresa, sinon al gobiernu del “Principado”, señalando mui concretamente a Adrián Barbón y a Cofiño como responsables de los despidos.

Les menciones a Adrián Barbón foron acompangaes de gritos de “sinvergüenza” y “traidor” por parte de la multitú aconceyada a la puerte’l Musel, y nel so discursu Fernán convidólos a desplicar los negocios sucios que tienen ellos y Autoridá Portuaria  na ampliación del puertu y cola mafia’l carbón.

Pa finar, visiblemente emocionáu, condergó con enfotu la violencia: la de despedir a los compañeros y condergalos a la miseria “eso si que ye violencia y ye terrorismu. Eso ye lo que importa, los daños materiales igual nos dan, tienen preciu pero nun tienen valor…”

Llucía F. Marqués

This work is licensed under a Creative Commons Attribution 4.0 International License.