El postreru llistáu, de 553 propiedaes inmatriculaes, apurríu pol Colexu Oficial de Rexistradores de la Propiedá a la Xunta Xeneral, tampoco ta completu

La Ilesia católica sigui despintando los datos de los bienes y propiedaes que punxo al so nome ente 1946 y 2015, apoderándose d’ellos ensin documentar la so propiedá; pa ello, cuenta cola connivencia del Principáu” y de les instituciones que teóricamente tendríen de velar pol padremuñu de los asturianos.

El postreru llistáu unviáu pol Colexu Oficial de Rexistradores de la Propiedá a la Xunta Xeneral espeya un total de 553 propiedaes. Nun ye fácil identificar les mesmes, el rexistru ye’n munchos puntos confusu y al Grupu de Inmatriculaciones Asturies llevó-yos un tiempu interpretalu correchamente. Esi llistáu ye muncho más completu que l’inicial, que nun algamaba la trentena y que foi remanáu por Berta Piñán nel parlamentu, a sabiendes de qu’esistía un segundu muncho más completu, pero hai motivos pa pensar que ye entá incompletu, una y bones el Grupu de Inmatriculaciones Asturies tien nel so poder notes rexistrales simples de bienes que la Ilesia punxo al so nome y que nun apaecen recoyíos en dengún de los dos llistaos. Barrúntase que la cifra total de inmatriculaciones podría rondar los 1.500, el triple de los reconocíos enagora.

Dende’l Grupu de Inmatriculaciones ufren el casu de Santa María del Naranco como exemplu de la falta de tresparencia nesta tema: un edificiu de calter civil, venceyáu a la monarquía asturiano y perteneciente al Prerrománicu Asturianu, un estilu arquitectónicu únicu nel mundu y protexíu pola UNESCO; entrugóse dolce vegaes pola titularidá d’esti bien en concretu, y otres tantes recibióse una negativa a dar esa información, que llegalmente tendría de ser pública. Nun ye l’únicu casu, recibieron negatives sobro la titularidá d’otros monumentos, como San Salvador de Priesca, San Pedro de Nora, Santa María de Bendones, Santiago de Gobiendes, la ilesia de Santianes de Pravia  o la Cámara Santa de la Catedral.

De los 16 monumentos que componen el Prerrománicu Asturianu, el “Principado” namás incluyó nel so Llibru Blanco la metá. Dica agora confirmáronse oficialmente como inmatriculados pola ilesia seis d’ellos: Santo Cristina de L.lena, Santullano, San Miguel de Lliño, San Salvador de Valdediós, Santu Adriano de Tuñón y Santiso. Tán a la espera de saber qué pasó con San Llorienzo de Cortina, n’Avilés, San Pedro de Nora, Santa María de Bendones, Santiago de Gobiendes y l’ilesia de Santianes de Molenes de Pravia.

Nuria Prendes

This work is licensed under a Creative Commons Attribution 4.0 International License.