En Xineru d’esti añu Andecha Astur punxo en conocimientu de la OLAF los fechos fraudulentos recoyíos pola Comisión d’Investigación abierta pola Xunta Xeneral

La Oficina Europea escontra’l Fraude (OLAF) almite a trámite la denuncia interpuesta por Andecha Astur a entamos d’añu na que se informaba a esti organismu de la esistencia de práutiques fraudulentes por parte del sindicatu UXT y desvíu sistemáticu de fondos al mesmu, recalcando l’apropiación illegal de les sovenciones europees recibíes pa formación pal emplegu, puntu esti qu’incumbe direutamente a les competencies de la OLAF.

La estimación del fraude  pente los años 2010 y 2014 asciende a 1’35 millones d’euros, sigún informó la UCO de la Guardia Civil, cifra que la Intervención Xeneral de l’Alministración del Estáu (IGAE) incrementa fasta un mínimu de 1’4 millones, notificando al xulgáu  que la cifra final del fraude podría ser entá muncho mayor.

La información puesta en conocimientu de la OLAF tien la so fonte nos datos recoyíos pola mesma Xunta Xeneral d’Asturies, al traviés de la Comisión d’Investigación abierta col envís d’esclariar los fechos en 2017. Nel dictame acúsase direutamente a la UXT de tener n’Asturies un entramáu d’empreses pantalla y fondaciones que-y permitieron elevar la faturación y evitar los controles, prevocando un gran quebrantu a les arques públiques. Sicasí, esti dictame nun pasó a ser consideráu “oficial” polos votos a la contra de PSOE, PP, IU y Ciudadanos, que xustificaron y tapecieron col so votu el comportamientu de la UXT.

El prósimu pasu ye que la Oficina Europea contra’l Fraude entame un procesu d’investigación de los fechos denunciaos y valore, como pidi Andecha Astur, la suspensión cautelar de cualisquier sovención al sindicatu español UXT.

Redaición InfoAsturies

This work is licensed under a Creative Commons Attribution 4.0 International License.