Tres de la fuerte rempuesta social a la noticia de la intención d’Alimerka de nun renovar los contratos con ganaeros de la IXP, a empresa asegura que’n 2021 caltendrá, como mínimu, el volume de compra actual a los ganaeros asturianos
La noticia de la intención de nun renovar los contratos a los ganaeros asturianos productores de xata asturiana saltó’l mes pasáu a les redes al traviés d’esti y otros medios. Les reaciones nun se ficieron esperar: retuits, comentarios ofendios, menacies de boikot y la intervención d’Andecha Astur, pidiendo la intervención al Conseyeru de Desendolcu Rural, Agroganadería y Pesca, al Conseyu Regulaor de la IXP Xata Asturiana y al Conseyeru Sanidá. En pocu tiempu la presión social frutió y Alimerka espubliza un comunicáu informando que renueva los contratos colos cebaeros pa poder siguir ufiertando carne asturiana nes sos carniceríes.
Na nota informativa que’l presidente de la cadena de supermercaos, Alejandro Fernández González, unvió a los trabayaores, a la noticia apurría a los medios de comunicación amiéstase una fuerte presión corporativista, llegando a afalar a los emplegaos a “tresmitir esti mensaxe a tou veceru o persona que vos tresmita dalguna dulda: Alimerka nun camudó”. Nun hai, sicasí, declaraciones oficiales del responsable direutu de la decisión anicial de suspender los contratos, Sergio Marqués, encargáu de la estaya de compres cárniques.
Nun ye la primer vegá qu’Alimerka s’amuesa sensible a la presión social: nel casu de les emplegaes a les que se yos torgara l’usu del asturianu nel desempeñu’l so llabor la reación de los veceros tamién fexo dar un xiru a la política de la empresa.
This work is licensed under a Creative Commons Attribution 4.0 International License.
