El Conceyu de Xixón entama dellos talleres pa la reciella venceyaos a la cultura asturiana y con toles midies de seguranza
La primer propuesta que vos treslladamos ye un taller de cómic col ganaor del premiu Alfonso Iglesias de cómic n’asturianu, Ruma Barbero, col que la reciella d’ente 6 y 12 años deprenderán a debuxar les maraviyes de Xixón pente’l 20 ya’l 31 de Xunetu nel CCAI.
Del 13 al 17 de Xunetu tendrá llugar el tallerín “Vistiéndonos como antaño”, una perbona oportunidá pa que la reciella de 6 a 12 años conozan una dómina mui especial na hestoria d’Asturies al traviés de la so vistimenta tradicional. Muncho más que ropa, lo que la xente usaba fálanos de la so identidá, les sos creyencies, oficios, ritos, fiestes, etc.
Los más piquiñinos, d’ente 4 y 6 años, podrán conocer a una neña con muncha gana de saber, un ser mitolóxicu, un conxuru y unos cuantos animales baillarinos que los convidarán a desfacer un encantexamientu, tou ello n’actividá “Baille embruxáu” que se cellebrará del 7 a 10 d’Agostu nel Tendayu del Muséu del Pueblu d’Asturies.
Pa finar, un guiñu al andanciu pa los rapacinos nel taller “Ponte la mázcara”, empobináu pa neños y neñes de 5 a 8 años, nel que fadrán otra triba de mazcarina más tradicional que les que llevamos estos díes. Con esta actividá, que se fadrá del 10 al 14 d’Agostu, avérase a les neñes y neños a la mitoloxía asturiana: recorten, coloreen y decoren la mázcara del personaxe mitolóxicu que más-yos preste.
Redaición InfoAsturies
This work is licensed under a Creative Commons Attribution 4.0 International License.
