Mañana entama’l plazu pa solicitar cita previa pa participar nel programa, qu’algama esti añu la so vixésimo segunda edición

L’aniciativa, que promueve l’intercambiu de baldre de llibros de testu pente estudiantes, complementa los programes entamaos nos estremaos cientros poles AMPAS. El llugar nel que s’entregarán y recoyerán los llibros ye l’avezáu: los llocales del Conseyu de Mocedá de Xixón, con acesu pola Avenida la Costitución, 45 (Espaciu Astragal). Les peculiares circustancies d’esti branu camuden el furrulamientu del plan d’intercambiu de llibros de testu que de magar el 2008 entama’l Conseyu la mocedá de Xixón en collaboración cola Asociación Xuvenil Estudiantes Progresistes y la ubicación ye lo que menos camuda nesta edición COVID19: los vales de papel sedrán sustituyios por correos lletrónicos, les fases sedrán namás dos, una de recoyida y otra d’entrega, con fin el 30 setiembre, y namás s’atenderá con cita previa.

Pa garrar vez ye preciso unviar un WhatsApp con nome y apellíos al númberu 684 645 812, daqué que non solo facilitará’l cumplimientu de les midies de seguridá impuestes pol andanciu, sinon que finará colos madrugones y les llarguísimes coles de families que carauterizaben esti programa.

La primer fase, de recoyida, entama’l 6 de Xunetu y fina’l 31 del mesmu mes, pente les  10.00 y les 14.00 hores. Por cada llibru en bon estáu que s’entregue nesta fase, recibiráse un vale virtual que dará drechu a optar a otru que se necesite pal cursu entrante.  Con una pausa pa organizar los llibros recibios y poder repartilos, pero entá aceutando donaciones, la segunda fase entama’l 17 d’Agostu y continúa dica’l 30 Setiembre, esti caberu mes n’horariu de mañana y tardi.