El Sindicatu Asturianu d’Ensiñantes SUATEA denuncia que desque la LOE introduxera’l conceutu d’inclusión ente los sos principios y fines, denguna llei posterior esaniciara esti conceutu, pero tampoco lu sofitó cola inversión presupuestaria qu’implica
Nos postreros 14 años, les alministraciones educatives llexislaron sobro la inclusión en dellos decretos, istruciones, circulares ya, inclusive, na formación del profesoráu, tratando de crear una ilusión de equidá que nin los docentes nin les families llegaron a creyese nunca, a falta de los recursos imprescindibles pa poder garantizala.
Mientres l’Estáu d’Alarma los escolinos con necesidaes educatives especiales o de sofitu vieron como la so atención educativa de deterioró entá más.
Les istruciones del cursu 2020-2021, lloñe de solucionar la situación y compensar el desaxuste carecíu, son entá menos esperanzadores. Nes mesmes inclúyense una riestra de cambeos que, pali que pali, amenorguen entá más esta inclusividá.
Per una parte, faen sumir la referencia a los sofitos intensivos d’hasta 10 hores selmanales pa escolinos con trestornu grave de conducta, discapacidá por autismu, discapacidá motora o auditiva, lo mesmo que la posibilidá de que les unidaes y departamentos d’orientación de cada centru puedan dar l’alta de necesidaes educatives especiales en cualisquier momentu del añu escolar, solicitando darréu l’asignación de los recursos necesarios, ensin necesidá d’esperar al cursu siguiente. Esta cabera midida, qu’entainaba y ampliaba l’atención a la diversidá, tuvo una percurtia vixencia de malpenes 8 meses de los que 3 correspuenden a los meses de cuarentena, polo que nun pudo ser aplicáu.
Amás d’estos cambeos a pior, dende SUATEA reclamen que s’unvien los recursos (ausiliares educatives, fisioterapia y/mediación comunicativa…) a onde ta l’alumnáu con necesidaes, y non al aviesu, evitando crear centros nos que se concentre l’atención especializada frente a otros ensin recursos.
En concretu, énte la escasez d’Aules Abiertes, los nuevos escolinos con autismu enfrentense al cursu ensin saber a qué tipu de centru van allegar nin con qué sofitos. Otru colectivu históricamente desoyíu pal que nun se prevé incorporar aiciones específiques, ameyorar nin entainar l’atención ye’l de los alumnos con NEE por Altes Capacidaes.
Finalmente, dende SUATEA soliciten atención d’Audición y Llinguaxe y sofitu de PT pa tou escolín de bachilleratu o FP que lo precise, y non namái p’aquellos con discapacidá auditiva, disartria o TEA.
Ye imposible cubrir toes estes necesidaes ensin inversión y l’enclín d’atendeles con profesoráu interín torna l’atención nos centros en daqué aleatoriu, dependiente en cada momentu del númberu d’escolinos con informe pa recibir sofitu educativu, colo qu’énte nueves necesidaes ye imposible responder a elles o siquier identificales con axilidá.
Redaición InfoAsturies
This work is licensed under a Creative Commons Attribution 4.0 International License.
