Asturies tien un 81% de territoriu rural. L’aplicación de la modificación propuesta pol presidente implicaría la obligatoriedá de llevar mazcara en tol territoriu asturianu. Pensailo. En 321 pueblos vive namás una persona, n’otros cerca de 3.000 viven 10 o menos. Tendríen de llevar mazcarina; obligatorio
Adrián Barbón (SuperBarbón pa los amigos) vien d’anunciar la obligatoriedá del usu de la mazcarina en tolos llugares, interiores y esteriores, independientemente de que se pueda, o non, guardar la distancia de seguridá de dos metros, esceición fecha de meses de chigres y terraces que, comu toos sabemos, creen al so rodiu un campu d’actuación microviricida que mos fae a toos temporalmente inmunes.
Voi facer un esfuerciu por nun entrar nel alderique de la utilidá o non de la mazcara comu mediu preventivu, porque nun soi esperta; nin siquiera voi meteme a valorar les contradiciones nes normes que se tan aplicando o l’arbitrariedá cola que cualisquier actu públicu, cultural o popular ye canceláu entantu los negocios siguen en marcha. Fadré un esfuerciu enorme por nun mencionar denguna de les milenta teoríes cospiranoiques y de nun ver na mazcarina una mordaza tan efeutiva comu la de la llei del mesmu nome. Voi falar de lo que veo, y de datos.
Escribo sentá delantre la ventana, nuna cai de Xixón tou menos céntrica. Nos caberos cinco menutos pasaríen per delantre unes 15 persones, la mayoría soles o acompangaes del perru. Eso ye porque ye pela mañana, de tardi habría tamién guahes xugando na plazuca y grupinos d’adolescentes cruciando de xemes en cuandu delantre’l mio mirador.
D’eses 15 persones, namás dos diben ensin mazcarina. Otres dos llevábenla de pulsera y una más de diadema, entantu que tres preferíen la opción cubrepapada, mui apreciá polos que carecemos sobrepesu. De les que llevaben la mazcarina en so sitiu, dos yeren de tela, de les que se merquen perdayuri, mui prestoses polos sos diseños variaos y polo fresco de la so traspirabilidá, al nun llevar filtros y tar feches de tela poroso. Otres 3, la mayoría, lleven mazcarines quirúrxiques, eses azulines que dan perceguera pola impresión de vivir nun hospital y que nun tienen una duración efeutiva de más d’unes hores, pero que bien utilizaes dan pa mes y mediu de mazcarina compartía familiarmente. Sólo una llevaba lo qu’abultaba una mazcarina seria, ya sabes, d’eses qu’asemeyen un filtro de café.
Denguna d’eses quince persones tenía dala posibilidá de contaxar o ser contaxáu, pero más de la metá podríen llevar multa, de cumplise les espeutatives del Sr. Barbón, que tan bien se-y da aprofitar pa subise al carru de les grandes ciudaes y salir nes semeyes. Faigo un incisu pa entrugame el porqué d’esti cosmopaletismu patéticu qu’asemeya la cai Uría y les caleyes d’Asturies cola Gran Vía o Las Ramblas.
Namás el 0’7 % de los asturianos usaron mazcarina esta temporada pasada, ye un datu. Asturies ye’l territoriu europeu con menor índiz de contaxos, cercanu al ceru, el caberu mes, ye otru datu. Puestos a dar datos, el tiempu másimu indicáu d’usu continuáu d’una mazcarina quirúrxica ye de 4 a 6 hores. Pasar d’esi umbral conlleva problemes del tipu infeiciones, fongos, dermatitis… en munches persones, amás, l’usu de mazcarina acarreta problemes respiratorios y d’ansiedá.
Sigo colos datos. Calculo qu’una familia de 4 miembros, comu la mía, usaría un terminu mediu de 50 mazcarines semanales, unes 240 mensuales, lo que al preciu fixáu en BOE de 0’96 salme a más de 230 euros, pero ¿qué problema ye esi pa les prósperes families asturianes?.
Más datos: tolos contaxos aportaos a Asturies depués de cerca d’un mes ensin rebrotes vinieron del esterior de magar l’apertura de fronteres. Entendemos que’l “Principado” ye incompetente pa presllar les llendes, como nun se cansen de repetir, pero d’ehi a poner en marcha planes de sofitu del turismu, comu se ta faciendo en Xixón, hai un cachu. Asturies y Murcia son los destinos más económicos esti branu, a nivel estatal. Igual teníemos que facénoslo mirar.
Llucía F. Marqués
This work is licensed under a Creative Commons Attribution 4.0 International License.
