La Conseyería de Sanidá nun autoriza los pasucais programaos, polo que la programación queda en namás les esposiciones, que tarán abiertes al públicu fasta’l vienres 24

La vixesimo cuarta edición del Intercélticu d’Avilés sedrá la más curtia y escasa de la so hestoria, les restriciones impuestes pol Covid-19 faen imposible la so cellebración normal. Anicialmente, ante los bonos datos de la evolución de la enfermedá n’Asturies, la organización prevía la cellebración de pasucais musicales nes feches del Intercélticu, pero la menacia de rebrotes desaconseya incluso eso y la Conseyería de Sanidá nun los autoriza, polo que la programación queda en dos esposiciones.

Ya mesmo puen esfrutase de les dos esposiciones de calter etnolóxicu. La primera d’elles, nagurada ayeri polos sos organizadores, la Lliga Celta d’Asturies, ye la de “Ástures Luggoni, armamentu y vestuariu na edá del Fierru”y como’l so nome indica ta dedicada al armamentu ya indumentaria de la cultura castreña na Edá del Fierro. Podrá visitase fasta’l vienres 24 de Xunetu de 11 a 14 hores.

La otra, dedicada al fatu tradicional y a los istrumentos del país, ta nes istalaciones d’El Corte Inglés d’Avilés, onde pue vese n’horariu comercial fasta la mesma fecha.

La organización llamenta les molesties que pudiere producir l’anulación del pasucais a última hora, ya que la resolución de la Conseyería de Sanidá nun aportó fasta’l vienres 17 de Xunetu, dos díes anantes d’entamar la programación.