Dientro de la campaña #laguerranunyeunafolixa #Asturiescielosinarmas,  CODOPA convoca un concursu semeyes a traviés d’istagram nel que’l premiu sedrá un vuelu en parapente. El tema sedrán oxetos volaores non dañibles y les semeyes tendrán que corresponder al añu en cursu. Pa participar basta con subir a instagram la semeya col hastag #Asturies cielosinarmas y seguir la cuenta de CODOPA/Acción en Red/CMPA/Conseyu Mocedá de Xixón, anantes del 26 d’esti mes.

Añu tres añu el Festival Aéreu aconceya bon númberu de voluntades a la so contra. A los activistes en favor d’una cultura de la paz y de la desmilitarización d’Asturies xúnense los que, amás, consideren una ofensa hestórica el vuelu sobre Xixón del mesmu exércitu que masacro a la so población, los que lo consideren una xabazada en términos ecolóxicos, económicos y educativos y aquellos a los que yos abulta una inxerencia menaciante y colonialista por parte l’estáu español.

Sicasí, foi l’andanciu y non la presión popular la que frena esti añu la cellebración del Festival Aéreu de Xixón, el mesmu virus que fae remanecer la importancia de la sanidá a nivel global. Los detractores del Festival remembren que col presupuestu  dedicáu a los aviones  Eurofighter EF-2000 y A-400M podríen caltenese 25 hospitales y 27.720 cames d’hospital durante un añu.

Llucía F. Marqués