El sindicatu SUATEA ve con suma esmolición la evolución de los acontecimientos que se vienen produciendo nel sector de la Educación Pública Asturiana

A pocu más d’un mes para l’entamu de cursu, l’escenariu educativu ta marcáu pola falta d’instrucciones concretes que garanticen seguridá sanitaria pal conxuntu de la comunidá escolar y el repitíu refugu dende  l’Alministración de les propuestes presentaes poles organizaciones sindicales pa amenorgar ratios y reforzar les plantiyes de profesoráu.

La política de comunicación de la Conseyería llevó a un malestar xeneralizáu ente’l profesoráu, que refuga la so actuación nestos caberos meses y “siente como una faltosada les sos últimes declaraciones, nes que llega a poner en dulda la capacidá comprensiva del profesoráu”.

El problema del personal interín, que si yá otros años taba descontentu cola so situación, la manera en que se convocaron les places anguañu nun fixo sinon medrar el so malestar, ye otra de les feríes abiertes que precisen una urxente solución, como desixeron na concentración del día d’ayeri los mesmos afectaos.

Énte esta situación, pa SUATEA resulta destacable’l silenciu’l Gobiernu d’Asturies, presidíu por Adrián Barbón que, a desemeyanza de la so actitú n’otros ámbetos, permanez impasible énte l’alderique que se desenvuelve nel marcu educativu, amosando una “Esmolecedora falta de compromisu cola Escuela Pública Asturiana”.

En casu de que les sos reivindicaciones pal entamu de cursu nun seyan escuchaes, nun refuguen l’entamu de contactos col restu d’organizaciones sindicales pa convocar movilizaciones y fuelga coincidiendo col entamu de cursu, desixendo les rectificaciones que puedan corresponder, incluyíes les dimisiones de los que llevaron a esta situación.

Redaición InfoAsturies

This work is licensed under a Creative Commons Attribution 4.0 International License.