Un proyectu en Twitter, Russian Telegraph, ta narrando pasu ente pasu la Revolución Rusa de 1917

Ye mui habitual ente una parte de los creadores de ciencia hestórica’l reclamar una “Hestoria dende abaxo” frente a les tendencies historiográfiques dominantes, que ponga voz y cara a les mases populares como suxetos protagonistes del procesu hestóricu. Lo fácil ye facer una reivindicación teórica, lo difícil ye xenerar proyectos de divulgación que seyan coherentes con esi plantegamientu.

Dientro d’esa llínea una cuenta de Twitter, venceyada a l’antigua Russia Today, ta tuiteando en tiempu real los acontecimientos d’aquel procesu revolucionariu como si tuviera retresmitiendo un sucesu actual. Pero amás sirve de nexu central pa una rede de cuentes paraleles de personaxes de la dómina, tanto conocíos (el zar Nicolás II; Vladímir Lenin, entá nel so esiliu suizu; Joseph Stalin, acabante llegar a Petrogrado; la princesa Olga Paley, tía del zar) como anónimos (el panaderu Filippov, el trabayador Ivan Chugurin, el capitán Vasili Zeitlin, soldáu zarista) que dende les sos anécdotes personales apurren otra visión de la realidá.

This work is licensed under a Creative Commons Attribution 4.0 International License.