“Asturies nun tien rei. Asturies tien un pueblu honráu y trabayaor que quier un sistema políticu social, xustu y democráticu, onde la ciudadanía pueda decidir con llibertá”

Güei a la una la tardi los republicanos d’Asturies aconceyaron na Plaza los Xardinos del Náutico, convocaos por Andecha Astur, Anticapitalistes Asturies, Bloque Críticu, Centros Sociales d’Asturies, Comité pola Amnistía, Corriente Sindical d’Izquierda, Darréu y Federación Asturiana Memoria y República, con la colaboración también de La Comuna, Plan de Choque y SUATEA.

L’actu entamó cola llectura por parte de Violeta Sánchez d’un comunicáu nel que se denunció la presencia de la familia real española nesi mesmu intre en Xixón, nun paséu que calificaron de “terapia de blanqueamientu y desfile d’autocomplacencia” y se repitió qu’esta monarquía nun representa a los asturianos. “Asturies nun tien rei. Asturies tien un pueblu honráu y trabayaor que quier un sistema políticu social, xustu y democráticu, onde la ciudadanía pueda decidir con llibertá”.

Na so intervención Violeta Sanchez remembró la imposición del “Estatutu d’Autonomía ya’l castigu de la condición de “Principado”, de la corrución endémica de la familia Borbón y de la so responsabilidá na fonda crisis que se vive n’Asturies, pidiendo en nome de les organizaciones convocantes que nun se repitan estos actos de blanqueamientu, que se investiguen y castiguen los presuntos delitos cometios polos Borbones, que s’abra un debate social y políticu fondu sobre’l réxime políticu que lleve, pente otres consecuencies a l’abolición de la monarquía y que la representación política asturiana dexe de comportase comu súbditos y entame a ser una “representación direuta y democrática del pueblu trabayaor”.

Darréu la llectura, y tres d’un tiempu coreando llemes comu “Asturies nun tien rei” , “los borbones a los tiburones”, “Asturies, mañana, sedrá republicana” o “República Asturiana, socialista y soberana”, entamó la quema de semeyes de los reis d’España, na que amburaron más d’un centenar d’imáxenes del monarca y la so familia.

This work is licensed under a Creative Commons Attribution 4.0 International License.