Iniciativa pol Asturianu denuncia un nuevu casu de discriminación llingüística y remembra que la Llei 1/1998, de 23 de marzo, d’usu y promoción del asturianurecueyenel so artículu 4, relativu al usu alministrativu, el drechu a utilizar l’idioma nes comunicaciónes pente la ciudadanía y l’alministración
El pasáu 24 de xunetu un profesor de secundaria desplazóse a facer un trámite a la OCA (Oficina Comarcal Agroganadera) de Villaviciosa pa unviar una documentación a la Conseyería d´Educación pente medies del rexistru.
El ciudadanu foi a la oficina con cita previa a les 10:15 de la mañana. Presentó la documentación a la funcionaria y cuando ésta se decata de que’l “espón/solicita” ta redactáu n´asturianu pal trámite, diz al solicitante qu’ella sólo puede “recoyer documentos en castellán”. L’interesáu trata d´informar a la funcionaria de que como ciudadanu ta nel so drechu de presentar documentación n´asturianu a l’alministración autonómica. La funcionaria retruca que “ni n’asturiano, nin n’inglés, nin en denguna llingua que nun seya’l castellán”, devuélve-y el documentu que taba n´asturianu ya indíca-y que la única manera que tien de facer el trámite ye “escribiéndolo en castellán nuna tradución lliteral”. Nesi momentu, pa poder siguir col trámite, la funcionaria apurre-y una fueya y un bolígrafu y diz al´interesáu en que tornar el documentu al castellán.
Una vez en castellán, la funcionaria continúa col trámite. El solicitante usa´l so móvil pa buscar ya informar a la funcionaria de la Llei d’Usu de 1998 detallando lo tocante a la presentación de documentos n´asturianu a l´alministración autonómica pero la funcionaria retruca que “tienen istrucciones pa recoyer namás documentos redactaos en castellán” y que “eso que dices ye lo que quieren conseguir últimamente pero que pol momentu nada”.
Al entrugar pol tipu d´istrucción que sigue pa nun poder recoyelo namás qu´en castellán la única rempuesta ye “son les istrucciones que recibimos”.
Iniciativa pol Asturianu desixe una investigación y esclaración del motivu y el responsable de la orde.La entidá denuncia que’l tratu recibíu nesta situación amuesa la falta de conocimientu al rodiu de la situación llegal del asturianu y de los drechos de los sos falantes. La organización recuerda que La Llei 1/1998, de 23 de marzo, d’usu y promoción del asturianu recueye nel so artículu 4, relativu al usu alministrativu, el drechu a utilizar l’idioma.
La organización denuncia asina mesmo qu’esta situación amuesa una gran falta de sensibilidá al comparar l´asturianu con llingües foriates dientro’l propiu territoriu asturianu y una falta total d´interés pola cultura llariega. Pa Iniciativa pol Asturianu queda nidio, una vegada más, que la oficialidá ye la única ferramienta pa garantizar la igualdá de los falantes d’estremaes llingües n’Asturies.
This work is licensed under a Creative Commons Attribution 4.0 International License.
