Los resultaos de la investigación arqueolóxica del castru d’Alava, en Salas, apunten a que nun hebio contautu cola presencia romana
Nos caberos tiempos garra puxu la romanofilia n’Asturies, ya en xeneral, los investigadores qu’estudiaren l’aniciu de l’actividá minera n’Asturies coincidíen en considerala consecuencia d’un procesu integraor de la población propia cola romana. Sicasí, los estudios más recientes, con encontu en dataciones radiométriques y dendrocronolóxiques algamaes nes mines de la Sierra de Bixega, en Balmonte Miranda, permiten adelantar abondo l’aniciu d’estes esplotaciones, espeyando que les mines de Balmonte y Salas foron esplotaes anicialmente polos astures, non polos romanos, ensin que se pueda documentar la relación pente ellos.
L’aqueoloxía romanófila vien de carecer un duru guelpe nuna investigación parte del so “Proyeutu Beriso”, demientres la escavación del castru d’Alava impulsáu pola Fundación Valdés Salas. La escoyeta d’esti castru en concretu nun ye casual, el so allugamientu en zona aurífera facía albidrar la presencia d’emportantes restos romanos que dieren pesu a la cacarexada teoría de la fuerte presencia romana n’Asturies; sicasí, los restos alcontraos apunten esautamente a lo contrario: el castru fore abandonáu na segunda Edá del Fierro ensin llegar a ser romanizáu.
Los cinco arqueólogos participantes na escavación nun alcontraron nin un solu resclavu de contautu colos romanos; lo que si alcontraron foi una muria defensiva datada pente los sieglos III y IV anantes de Cristu, xunto con otros nicios pertenecientes a la segunda Edá de Fierru, fecha na que tuvo llugar l’apaición de los romanos. Tou paez indicar qu’el castru suma a la llarga llista de castros abandonaos o quemaos pol exércitu romanu nel so pasu pel país.
En xeneral podemos decir que queda sobrepasada la idega de que los castros d’estes zones tuvieren una fundación na dómina romana pal control de los recursos auríferos, comu se repetía dende los círculos más insistentes na emportancia de la romanización d’Asturies, sinón que como norma xeneral nos castros escavaos n’Asturies tan datándose resclavos dataos d’al menos cinco sieglos anteriores a la conquista romana.
Llucía F. Marqués
This work is licensed under a Creative Commons Attribution 4.0 International License.
