La Casa los Hevia, en Villaviciosa, foi la sede onde tuvo llugar la entrega de los galardones de la diecisieteava edición de los Premios Meyor Sidre d’Asturies. La situación sanitaria obligó a reducir al másimo la presencia de públicu y torgó dafechu entamar el Salón de la Sidre d’Asturies, un alcuentru nel que les sidres acoyies a la marca de calidá DOP yeren presentaes al públicu metanes estremaes actividaes como tasties, harmonizaxes y espeutáculos.

Abrió l’actu Celestino Cortina, presidente de la DOP, que s’amosó optimista y convencíu de que van superase los pilancos d’esti añu y batise records de demanda y preciu pal añu qu’entra.  María del Pilar Coque recibió el reconocimientu comu la meyor collechera l’añu poles sos pumaraes de mazana de les variedaes DOP allugaes n’Obanca. Recoyeron los premios Julián Castañón, del llagar que lleva’l so nome, pol primer puestu na categoría de Sidre Natural Tradicional, Val de Boides; Tano Collada, enólogu del llagar El Gaiteru, pol premiu a Pomarina de Valle, Ballina y Fernández (Villaviciosa), como Meyor Sidre Natural Calistrao ya’l premiu a Meyor Sidre Natural Esplumosa, Alberto Fanjul, por Solaya, del Llagar de Quelo.