L’aición tuvo llugar na viéspora de la concentración antimonárquica que tendrá llugar esta tardi en Xixón, na Plaza Estación del Norte

Dientro la campaña de refuga al Reinu d’España, los antimonárquicos escolingaron ayeri decenes de pancartes col llema “Asturies nun tien rei” n’estremaos conceyos d’Asturies. Dalgunes de les pancartes diben un pocu más allá y completaben el mensaxe “Nin rei, nin reina nin Principáu”.

Nesta primer ronda allugáronse pancartes n’Avilés, Uviéu, Xixón, Sieru, Noreña, Nava, cuenques del Nalón ya’l Caudal y L’Infiestu, pero en prósimes aiciones cuenten aportar a los conceyos del Oriente, Ocidente y Sur d’Asturies.

Amás, les cais d’estes poblaciones enllenáronse con cientos de pegadielles col mensaxe “Asturies nun tien rei, Soberanía y República”.

Esta pegada masiva precede a la concentración que tendrá llugar güei a les 19:30 en Xixón y ensiértase na riestra d’actividaes revindicatives que desixen el fin de la monarquía española que se vienen desendolcando de magar el mes pasáu, convocaes en comuña por más d’una ventena d’organizaciones.

This work is licensed under a Creative Commons Attribution 4.0 International License.