L’Academia de la Llingua Asturiana torna a ser discriminada al nun algamar nin un euru de los presupuestos xenerales, daqué que contrasta fondamente coles partíes recibíes poles estremaes academies de les llingües oficiales del estáu
Llucía Fernández Marqués
La situación d’indefensión na que s’alcuentra l’asturianu, priváu de drechos y reconocencia, estiéndese a les istituciones venceyaes a ellos, como ye’l casu de l’ALLA, que tres de tar hai pocu a piques de perder la so sede por mor de la indeterminación xurídica na que s’alcuentra, carez agora esti nuéu dispreciu en forma d’agraviu comparativu, al ser la única Academia que nun recibe sofitu económicu del estáu que la creó.
Ta nidio que la mayor partida presupuestaria correspondió a la Real Academia de la Lengua €spañola (RAE) con 1.661.290 €, siguía pol Istitut d’Estudis Catalans, empatada en 283.070 € cola Real Academia Galega. L’euskera recibirá dos partíes, una pa l’Academia de la Lengua Vasca- Euskaltzainda y otra pa la Sociedá d’Estudios Vascos- Euskal ikaskuntza, con un total cuasi idénticu al de les dos llingües anteriores.
Esta situación nun ye nueo, vien siendo asina añu tres añu, ensin que los representantes políticos de los asturianos den amuesa de querer tomar midíes reales escontra d’esta inxusticia. Toles enmiendes a los Presupuestos Xenerales del Estáu presentaes al respeuto refugáronse col votu en contra del PP y d’UPyD. Iniciativa pol Asturianu considera que’l actual cambiu de repartu d’escaños abriría la posibilidá d’algamar sofitu a una posible enmienda pa que l’ALLA recibiera, al igual que les demás, una partida de los Presupuestos Xenerales del Estáu
Dende Andecha Astur consideren que, si bien sedría favoratible, esto sedría un remiendu más nel llargu percorríu de pizcos colos que quieren contentar a los asturianos y tornen a desixir la oficialidá de la nuesa llingua como solución a munchos de los sos problemes “El primer pasu pa iguar esti problema y munchos otros ye cenciellu y fácil d’algamar, casu d’haber vraera voluntá política: Oficialidá darréu.”
This work is licensed under a Creative Commons Attribution 4.0 International License.
