La obligación de caltener unes midíes sanitaries estremes ante la vulnerabilidá de los usuarios choca cola necesidá d’atender a los que quedarán ensin escolarizar

Los Cientros d’Apoyu a la Integración son un proyeuto ñacíu n’Asturies col envís de meyorar la calidá de vida y la integración llaboral y social de les persones con discapacidá. El confinamientu impuestu pol andanciu foi especialmente duro tanto pa los usuarios d’estos cientros, privaos del so llugar d’educación y socialización, comu pa les sos families, polo que nagüen pola reapertura del cursu, prevista pal 22 de Setiembre.

Sicasí, non toos podrán incorporase al añu escolar con normalidá: los estrictos protocolos sanitarios afitaos pa la prevención del COVID nos cientros d’integración, xustificaos pola especial vulnerabilidá de los sos escolinos, torguen la entrada a dengún nuevu usuariu, ensin que se prevea dala solución alternativa pa aquellos que, por edá y circustancies, yos correspondiere entrar comu nuevos escolinos esti añu.

Amás, estos cientros ayuden a los sos usuarios a rematar la so etapa escolar, dedicándose’l caberu añu a preparalos pa la so vida independiente de los mesmos, procesu que nun pudieron presllar aquellos que s’alcontraben nesi puntu l’añu pasáu, polo que les sos families reclamen que se yos prorrogue esti añu pa poder completar el ciclu, daqué que por agora nun se yos concedió.

De fechu, y pese a que s’alcuentren al 75% d’ocupación, l’almisión de nuevos escolinos sigue ensin fecha y la única opción pa los non almitios ye la permanencia nel llar.

Redaición InfoAsturies

This work is licensed under a Creative Commons Attribution 4.0 International License.