Coleutivos de mocedá acusen a l’alministración de tiranizar y culpabilizar a la xente mozo cola tema’l covid-19 mientres nun ponen soluciones nin a esti nin a los demás problemes preesistentes
La mocedá asturiana lleva décades soportando la presión d’unes polítiques socioeconómiques que dexen como opción cuasi única pa sobrevivir la emigración o l’aceutación de trabayos precarios, mayormente n’hostelería, que nun yos permiten entamar una vida pela so cuenta. Non en baldre n’Asturies la edá d’emancipación ye de les mayores d’Europa, cercana a los 30 años. Asina lo recuerden dende Puru Remangu “41.600 xóvenes marcharon d’Asturies na última década. Y con elles y ellos, muncho remangu, talentu, idees, frescura y toles coses positives qu’aporta la xente mozo a un llugar. Reivindicamos el derechu a marchar, a vivir nueves esperiencies, a conocer otres cultures, llingues y formes de vida. Esiximos el derechu a poder tornar, a tener un futuru equí”.
Los datos espublizaos pol “Observatoriu de la emancipación” del Conseyu de la Mocedá, relativos al caberu trimestre de 2019, espeyen que la mocedá asturiano tenía ya anantes del andanciu la tasa más baxa d’actividá (moces y mozos de 16 a 29 años que trabayen o busquen trabayu) de tol Estáu español, nun llegando nin siquier al 50%. “A ello sumaríemos una de les tases de paru más altes, amás de la fuerte emigración” remembren dende Darréu, autores de la campaña “La normalidá nueva, la precariedá de siempres”. Nella aporfien en que la crisis ye previa y estructural, “que precisa polo tanto de cambeos estructurales pa que la mocedá asturiano cunte con un futuru nel so país”.
Pel so lláu, el coleutivu AMA (Asociación de Mocedá Asturiana) echa en cara al Ayuntamientu de Xixón los trenta mil euros gastaos nuna desafortunada campaña cola que culpaben a la xente mozo del espardimientu del andanciu, enllenando “la ciudá y les redes sociales con contenios paternalistes que mos criminalicen y mos echen la culpa del aumentu de casos de coronavirus”. Comu rempuesta, dende AMA retrucaron con una fuerte contracampaña na que reclamen soluciones reales a los problemes sociosanitarios, apuntando a los auténticos culpables y a les soluciones que nun s’aplicaron, comu “Curiai al personal sanitariu. Converti-y los aplausos nuna meyor sanidá pública. Yá vos lo diximos” o “Acaba-y colos contratos temporales y precarios. Nun mos ñegueis un futuru dignu na nuesa tierra. Ya vos lo diximos“, pente otres recomendaciones, comu la contratación de más profesoráu na vuelta’l cole.
Llucía F. Marqués
This work is licensed under a Creative Commons Attribution 4.0 International License.
