Los escolinos con Necesidaes Educatives Especiales (NEE) son aquellos que requieren atención específico demientres la so escolarización pa ser quien a desendolcar tol so potencial. Esta atención especial  derivase d’estremaos grados y capacidaes presonales d’orde físicu, síquicu, cognitivu o sensorial, incluyendo rapacinos con peculiaridaes tan estremaes comu problemes d’audición, altes capacidaes, trastornos mentales, dificultaes sociales o emocionales, discapacidá física o intelectual, pente otres.

El cursu 2020/21, amás de toles normes y complicaciones derivaes de la proteición de la reciella frente al andanciu, la Conseyería d’Educación tien preparada otra midía especial, dedicada a ellos.  Esta estaya de la reciella -y les sos families- foi de la que más careció les consecuencies del empreslle y de la perda de clases presenciales. Tamién son, n’abondos casos, población de riesgu en casu de contaxu, polo que precisen d’una atención cuasi continua.

Por tou ello, dende l’entamu del plantegamientu del nuevu cursu tanto families comu ensiñantes lleven pidiendo un especial refuerzu na plantiya docente encargada d’atender les sos necesidaes. Lloñe d’ello, la decisión tomada “siguiendo les istruciones recibies” ye bien otra. Les clases de Pedagoxía Terapéutica y Atención al Llinguaxe van reducise a lo mínimo posible. Nun se tendrá en cuenta’l criteriu pedagóxicu de cada casu, atendiendo a tolos NEE dos hores a la selmana, en casu de PT, y una hora a la selmana, en casu d’AL, probablemente dividio en sesiones de 15 menutos, independientemente de la diversidá funcional que tengan. Amás nun se trabayará cola reciella que nun te específicamente evaluada comu NEE, daqué que dexa de llau a escolinos con dislesies, retrasos de llinguaxe o dificultades de deprendizaxe.

Pa munches families, esto equival a llevar los rapacinos al colexu a “aparcalos”, poniéndolos en pelligru ensin que reciban l’atención que precisen.