Irene Montero retruca a la entruga parllamentaria fecha por Andecha Astur nel Congresu poniendo la falta d’oficialidá como esculpia

El 016, teléfonu d’atención ante la violencia de xéneru, doméstica, sesual, mutilación xenital, matrimoniu forzosu, acosu llaboral y trata con fines d’esplotación sesual, atenderá les llamaes de les víctimes en 53 llingües estremaes, munches d’elles ensin falantes n’Asturies y namás 4 oficiales

Sicasí, la falta d’oficialidá del asturianu torna a valir d’argumentu pa xustificar la situación d’indefensión na que se dexa a les muyeres asturfalantes al inorar la so llingua.

Cuando se fexo públicu’l llistáu de llingües que diben falase, Andecha Astur fexo una entruga parllamentaria nel Congresu los Diputaos al traviés del diputáu Jon Iñarritu, de la coalición Agora Repúbliques, de la que forma parte, pidiendo desplicaciones pola discriminación de les muyeres asturiano falantes a la hora d’aceder a esti serviciu a les muyeres víctimes de violencia de xéneru.

El Ministeriu d’Igualdá, con Irene Montero al frente, afita que’l Conveniu européu sobro prevención y llucha escontra la violencia pa coles muyeres obliga a sofitales en llingües que pescancien, motivu pol que incluyen l’atención en 53 llingües de les que se tien costancia la presencia de dalgún falante nel estáu. En concreto,  nos pliegos de contratación especifícase que l’atención nel 016 tará disponible n’español, catalán, gallego, euskera, valenciano, inglés, francés, alemán, portugués, chino mandarín, ruso, árabe, rumano, búlgaro, afgano, albanés, armenio, bereber, bosnio, brasileiro, cantonés, checo, coreano, danés, esloveno, eslovaco, farsi, turco, finés, georgiano, griego, hungaro, holandés, indi, italiano, japonés, lituano, noruego, persa, polaco, serbocroata, Sirio, Tailandés, Taiwanés, ucraniano, soninké, urdu,  bambara, mandinca, wolof, poulaar, mandinca y tamazigh. Dalgunes d’estes llingües fálense namás en tribus perllonxanes d’África o en rexones de la India, con escasamente un millón de falantes nel mundiu ya ensín presencia confirmada nel país, lo que dificulta desaxeradamente l’atopar trabayaores que puean facer esa llabor. Obviamente la gran mayoría (49) nun son oficiales.

Poro, dende Andecha Astur nun almiten la esculpia de que l’Estatutu d’Autonomía nun reconoza la oficialidá del asturianu comu argumentu pa que se discrimine a les asturianes y consideren que ye un ataque direutu a los drechos de les asturianes y una amuesa más de l’asturfobia istitucional. “Con esta rempuesta queda n’evidencia que más allá del posturéu, Podemos asume dende’l gobiernu col PSOE, la política de represión lligüística cola que los partíos españoles castiguen a Asturies dende siempres”.

Ayeri mesmo espublizábemos esta mesma situación en relación a la non disponibilidá de l’aplicación RadarCOVID n’asturianu, espeyando que l’asturfobia ta perriba de cualisquier consideración de salú, drechos o proteición a la población.

Llucía F. Marqués

This work is licensed under a Creative Commons Attribution 4.0 International License.