La solitú ye crónica n’Asturies y tien nome femenín. Asina lo espeyen los datos de la Encuesta Continua de Llares correspondiente a 2019 fecha pol INE
Esti añu n’ Asturies baxó fasta los 454.500 el númberu de llares habitaos (200 menos que n’anterior encuesta) y espérase que’n 15 años el 36% de les viviendes seyan d’un solu ocupante. Pesi a que más d’un terciu de la mocedá d’ente 25 y 34 años continúa viviendo colos sos pas y medren les families que se reagrupen alrodiu los güelos por motivos económicos, son ya 138.800 los llares que tan formaos por una sola persona. Otros 52.000 tan formaos por un solu proxenitor (la má nel cuasi 90% de los casos) con ún o más menores a cargu, concentrando esti modelu familiar les rentes más baxes, seguíu del de les vilbes.
Les 75.800 muyeres que viven soles formen el conxuntu mayor dientro d’esti coleutivu, frente a los 63.000 homes nesta situación. La principal desemeyanza pente estos dos grupos ye que, mientres que les muyeres que viven soles la mayoría son vilbes, nel casu de los homes que viven solos son solteros o divorciaos, polo xeneral de menor edá que les muyeres soles.
En resume, n’Asturies vive ca vegada menos xente, menos families, más piqueñes y con más solitú pente les persones mayores.
Llucía F. Marqués
This work is licensed under a Creative Commons Attribution 4.0 International License.
