Andecha Astur cellebrará el 12 d’Ochobre un duple actu de memoria a los revolucionarios d’Ochobre del 34 col tradicional homenaxe al presidente Belarmino Tomás nel Cimenteriu Pando y  otru actu en reconocimientu de los Mártires de Carbayín, símbolu de la represión de la República Española contra la revolución asturiana

La primer cita sedrá a les 12 hores nel cimenteriu Carbayín, onde tan enterraos los 24 homes que fueron asesinaos depués de la ofensiva que los trabayaores de la cuenca del Nalón llevaron a cabu nos primeros díes de la revolución.

La segunda, a les 13:30 hores nel cimenteru pandu, onde se fadrá un actu de reconocimientu y homenaxe al presidente del Conseyu Soberanu, Belarmino Tomás, que tien la so tumba y una placa commemorativa nesi llugar. Belarmino foi ún de los principales protagonistes de la revolución d’Ochobre del 34, siendo l’interllocutor que negoció col exércitu de la República Española una rendición pautada que llueu los españoles traicionaríen, protagonizando una represión sangrina y xabaz de la que foron víctimes, pente otros munchos asturianos, los Mártires de Carbayín.

Esti actu de comemoración de la Revolución d’Ochobre’l 34 cellébrase añalmente na fecha del 12 d’Ochobre, metanes el periodu revolucionariu y coincidiendo cola Fiesta la Hispanidá, col envís de contraponer al patrioterismu colonialista español el deseyu de soberanía del Pueblu Asturianu.

P’Andecha Astur la situación de represión carecida por Asturies por parte la República Española caltiénse vixente demientres l’actual Monarquía, igual que se caltuvo vixente demientres la Dictaura facista, polo que ye más una cuestión de dominiu nacional que de sistema políticu. “L’homenaxe a la República Obrera y Campesina d’Asturies declarada n’Ochobre del 34 frente a la República Española, qu’incapaz de respetar el Drechu a Decidir del Pueblu Asturianu procedió a invadir militarmente’l nuesu país, ye un referente de renovada actualidá, en tantu que se caltién la situación de represión de los drechos nacionales y sociales del pueblu asturianu, y el determín de superalo recurriendo al exerciciu del drechu a la Soberanía, cola proclamación de la República Asturiana como finxu a algamar”.

LLUNES 12 D’OCHOBRE

12:00 Homenaxe a los Martires de Carbayín. Cimenteriu San Xuan. Carbayín – Siero

13:30 Homenaxe a Belarmino Tomás. Cimenteriu Pando – Llangréu

This work is licensed under a Creative Commons Attribution 4.0 International License.