Nel duple homenaxe que tuvo llugar ayeri nos cimenterios de Carbayín y Pando Andecha Astur fexo sentía alcordanza de l’Asturies Revolucionaria y remembróse la responsabilidá de la República Española y de la izquierda española na xabaz represión que siguió a ella, llamándo a deprender de los qu’entamaron esa revolución y buscar un proyeutu común que tresforme Asturies
Delantre la tumba de Belarmino Tomás, allugá nel Cimenteriu Pando, qu’Andecha Astur lleva más de venti años visitando nesta fecha, Mariano Suárez xugó al despiste al falar d’un presidente asturianu, de la cuenca, afiliáu al PSOE y que conoció en primer persona les mañes y trapayaes d’esti partíu, definición que -fasta ehí- cuadra tanto pa Belarmino comu p’Adrián Barbón. La desemeyanza ente ambos, destacó, ta n’actuación de caún d’ellos ante esta situación: rebelase y dar la cara, arriesgando fasta la vida, por defender una Asturies Llibre poniendo nes manes de los asturianos el so futuru o apautase dientro d’esi furrulamientu mafiosu del partíu al que pertenez y mercadear con Asturies en provechu propiu, aceutando les directrices unviaes dende Madrí.
Na so intervención, delantre’l monumentu a los Mártires de Carbayín, Marcos Fernández destacó’l fechu de que la República Española asesinó a los 24 mártires en frio, depués de pautase’l fin de la Revolución ya ensin tener especial responsabilidá nella, como un mensaxe al Pueblu Asturianu: España nun perdona.
Na so reclamación d’una Memoria Hestórica veraz que reconoza’l protagonismu del componente asturianu, acusó a la izquierda española de traición, primero al abandonar a Asturies nuna fuelga xeneral revolucionaria qu’ellos mesmos convocaren y nun asumieren, abandonándola a la so suerte y felicitándose incluso pola so derrota nel 37, y abandonándola agora al facer tolo posible por tapecer los fechos. “Foron incapaces d’asumir que los asturianos tomaren ellos solos un determín, que decidieren llibremente facer una revolución con un marcu específicu de llucha de clase, o entendiéronlo y nun lo quisieron almitir. Ehí entama la traición, que sigue dempués y llega fasta agora. Onde ta el PSOE, onde ta’l PCE, la CNT, porqué nun tan equí esta xente, estos son la xente a la que quitaron la vida baxo eses sigles, d’eses organizaciones, ¿onde tan? escondios.”
Pa finar la so intervención, llamó a deprender de la esperiencia de los revolucionarios y entendese pente estremaos proyeutos ideolóxicos, “tresmitiendo a la sociedá asturiana un proyeutu común nel que caún dende les sos peculiaridaes seyamos quien a coincidir en un mínimu” comu se ta faciendo’n colleutivos comu Asturies nun tien Rei y dende otres organizaciones “Los que pensamos na política comu n’algo más que la poltrona lo que queremos ye tresformar la sociedá, otra sociedá distinta, una Asturies estremada en tolos sentios, no económico, nel tarrén social, nel políticu… en defensa de los intereses colleutivos del pueblu asturianu. Y por esto tamos güei equí”.
Depués de cauna de les intervenciones tuvo llugar una ufrienda floral y musical, nes que s’interpretó La Flor del Agua.
Llucía F. Marqués.
This work is licensed under a Creative Commons Attribution 4.0 International License.
