Les ONG de desendolcu asturianes nun tán dimpuestes a arrenunciar a los 550.000 euros que taben presupuestaos paesti añu en Plan Estratéxicu de Sovenciones Sociales 2020-2023 del Conceyu d’Uviéu y vienen de llanzar la so campaña #UviéuNunCoopera, #OviedoNoCoopera, iniciativa que circula yá dende va delles selmanes poles redes sociales y que los llevó inclusive a presentar el pasáu 6 d’Ochobre una moción nel plenu del conceyu
“Pesi a queu la nuesa moción foi baltada pol bipartitu PP-Ciudadanos con 15 votos en contra, la nuesa propuesta recibió 11 votos a favor, lo que demuestra que cuasi la metá de los y les representantes de la ciudadanía d’Uviéu apuesta pola solidaridá internacional”, afirmó Ana Andrés, presidenta de la Coordinadora Asturiana de ONGD (CODOPA), que representa a 40 organizaciones del sector de la cooperación al desendolcu asturianu.
Esta campaña, que los sos materiales tán disponibles na páxina web www.oviedonocoopera.org, pretende non yá denunciar el retayu de 550.000 euros destinaos a proyectos de cooperación al desencdolcu sinón informar y movilizar a la ciudadanía uvieina sobro les consecuencies qu’estos retayos van tener tantu nel texíu asociativu asturianu como nos países en víes de desenvolvimientu onde la cooperación asturiana tien presencia, principalmente n’América Llatina y n’África Subsahariana.
La campaña #UviéuNunCoopera, #OviedoNoCoopera componse d’un manifiestu, empobináu al Gobiernu municipal de PP Ciudadanos, de diverses aiciones de sensibilización y de movilización en redes sociales, lo mesmo que de cartelos coles consecuencies de los retayos nos países en desenvolvimientu. Dicha páxina web tamién cunta coles noticies apaecíes en prensa dende l’entamu de les reivindicaciones, un pidimientu en Change.org, ya un espaciu dedicáu a los medios de comunicación.
La cume d’esta campaña va llevase a cabu nuna marcha que va tener llugar el prósimu sábadu 17 d’Ochobre, coincidiendo col Díe Internacional pa la Erradicación de la Probitú. La mesma va arrincar a les 12 del mediudíe dende la Estación de Trenes d’Uviéu pa desaguar na Plaza’l Teatru Campoamor.
Redaición InfoAsturies
This work is licensed under a Creative Commons Attribution 4.0 International License.
